سحر رامي عن سر رشاقتها: لسه برقص لغاية دلوقتِ | فيديو
قالت الفنانة سحر رامي إنها تحرص على ممارسة الرياضة بشكل دائم، وهذا سر الحفاظ على رشاقتها رغم تقدمها في العمر، حيث هي أم لابن عمره 30 عامًا.
وأضافت سحر رامي خلال لقائها ببرنامج “كلام الناس” مع المذيعة ياسمين عز: كبرنا لكن بنحاول المحافظة على رشاقتنا.. وحتى الآن أرقص بشكل مستمر وألعب يوجا".
وفي سياق آخر تحدثت سحر رامي عن زوجها الفنان الراحل حسين الإمام قائلة: "حسين الإمام من أول مرة شافني فيها عرض عليَّ الزواج وقال لي تتجوزيني فقلت له مش عايزة أتجوز أنا لسه ببدأ حياتي الفنية حينها ضحك وابتدينا نتعرف والحكاية بدأت بجد واتجوزنا".
فترة زواج حسين الإمام
ولفتت: "أكتر حاجة شدتني في حسين الإمام أن دماغنا كانت شبه بعض وأعجبنا ببعض وفترة جوازنا امتدت لـ22 سنة قبل رحيله من 8 سنين وانا حاسة انه في مكان تاني، حاسة ‘ن وفاته امبارح وبيوحشني جدا وهيفضل يوحشني لنهاية العمر، وما اتجوزتش من بعده".
وفاء زوجة حسين الإمام
وتابعت: "اتجوزت حسين الإمام ولحد آخر لحظة في حياتي هفضل مراته ومش هتجوز حد تاني من بعده، وقررت بيني وبين نفسي إني لما أتجوز ميكونش عندي قصص عاطفية هي زيجة واحدة وعلاقة عاطفية واحدة والحمد لله ربنا وفقني في قراري ومطلقتش ولا اتجوزت من غير زوجي حسين الإمام ولغيت الاحتفال بعيد ميلادي بعد وفاته".
اللحظات الأخيرة في حياة حسين الإمام
ولفتت: "يوم وفاته كان بيعمل مسلسل في بيروت وكنا بنحتفل بعيد ميلادي بالنهار مع مجموعة من الأصدقاء، واحنا رايحين بيتنا في الطريق الصحراوي يوم السبت الصبح بندردش أنا وهو عن مستقبل سالم ابننا ويدرس في بلجيكا ونستقر معاه ونبيع كل حاجة في مصر فقلت له يا عالم مين يعيش، وبعدين دخلنا فيلتنا كان بياخد دش وبعدين لقيته بيقولي أنا مش قادر آخد نفسي وبعدين سندته على السرير وهو في حضني وفي 5 دقايق راح وأنا كنت منهارة وبصرخ فطلعوا لي أصحابي اللي كانوا معزومين في عيد الميلاد، والتشخيص جلطة مفاجئة في الشريان التاجي ما بتتلحقش إلا بحقنة الأدرينالين في القلب خلال 10 دقايق وهو في الأساس ما كانش بيعاني من حاجة".
