حسن شاكوش: كانوا بيحسسونا إننا تجار مخدرات وبلطجية | فيديو
أعرب المطرب حسن شاكوش، عن غضبه واستيائه، بسبب وصف العديد من المطربين الجدد بالبلطجية، وتجار المخدرات، طوال الفترة الماضية، أثناء إيقافهم من نقابة المهن الموسيقية طوال الفترة الماضية.
وقال “شاكوش” لـ “فيتو”: “كانوا بيحسسونا إننا بلطجية وتجار مخدرات، رغم إن كل المطربين الشباب ومطربي الراب متعلمين، وفي جامعات كبيرة، وفي ناس من النقابة عارفين كويس الكلام ده".
وتابع “شاكوش” في تصريحات خاصة لـ “فيتو”: “في موضوع تاني وهو إن كل شوية تشكيك في مشاهدات اليوتيوب، وأنا بقولهم إنتوا كذابين، وكل واحد بيقول كدة أتحداه، ممكن تلعب وتكبر الانستجرام، لكن اليوتيوب لأ”
وأختتم: “في ناس لما بتشوفنا ناجحين بتزعل، وإحنا قدمنا أغاني كويسة للبلد، وعاملين مشاهدات عالية، وكانت شمس المجرة رقم واحد على العالم، وشمس المجرة رقم 2، وفي النهاية شكرًا للنقابة إنها رجعت الثقة لينا تاني”.
قال مطرب المهرجانات حسن شاكوش: "وقعنا لنقيب الموسيقيين الفنان مصطفى كامل على إقرار انضباطي يتضمن مجموعة من المطالب ومنها الابتعاد عن أي كلمات خارجة، ومبقاش فيه حاجة اسمها مهرجانات.. كلنا هنبقى في شعبة الأغاني الشعبية وأنا بقيت مطرب شعبي، وحمو بيكا هياخد ترخيص أداء صوتي ودي شعبة جديدة".
الأداء الصوتي وحنان مصطفى كامل
وتابع خلال مداخلة هاتفية ببرنامج "الحكاية" الذي يقدمه الإعلامي عمرو أديب بقناة "إم بي سي مصر": "الأداء الصوتي للناس اللي مبتعرفش تغني خالص زي حمو بيكا، والمطرب الشعبي زيي، وكلنا بناكل عيش، وحسينا بالحنية داخل النقابة، والفنان مصطفى كامل جمعنا ولمنا، واللي قبله كانوا بيتعاملوا معانا وكأننا مش مصريين".
مشكلة هاني شاكر
وأكمل: "الفنان هاني شاكر مكنش بيجمعنا وكان صعب جدًّا اننا نوصله ومفيش فرصة يسمع شكوانا، وكأننا حشرة في المجتمع أو أننا صيع وقاعدين على قهاوي ومش ولاد ناس، وإحنا لما نقعد في البيت هنشتغل إيه وكل واحد فينا ملزوم منه 60 بيت هيأكلهم منين أكيد بقى هيمشي في الحرام بقى".
وتابع: "دمنا نشف أيام الفنان هاني شاكر من كتر ما كنا بنقول عايزين ناكل عيش، والمجلس القديم بهدلنا، ومع الفنان مصطفى كامل بقى لينا ضهر".
