آخرهم تامر فرج.. فنانون عانوا من قلة المشاركة في الأعمال الدرامية

تشهد الساحة الفنية من حين لآخر ظهور فنان يشكوا من قلة مشاركته في الأعمال الفنية، آخرهم الفنان تامر فرج الذي عبر عن استيائه بسبب قلة مشاركته في الأعمال الفنية. 

ومن خلال السطور التالية نرصد أبرز الفنانين الذين عانوا من قلة المشاركة في الأعمال الفنية مؤخرا: 

تامر فرج 

خرج الفنان تامر فرج عن صمته، ليعرب عن استيائه من قلة مشاركته في الأعمال الفنية سواء الدراما أو السينما، موضحًا أنه يفكر في الاعتزال بسبب عدم وجوده على الساحة الفنية بشكل كبير.

وكتب تامر فرج، منشورًا عبر حسابه الشخصي بموقع التواصل الاجتماعي فيسبوك، حيث قال: البوست ده مش حالة اكتئاب ولا يأس ولا انهزامية خالص.. هو مجموعة أسئلة أرجو أنها توصل للقائمين على صناعة الدراما والسينما والفن في البلد وبره البلد، وحد يتكرم مشكورًا بالرد عليها.

وأضاف تامر فرج: الحمد لله الناس كلها بتقول لي أن أنا موهوب وعندي كاريزما، ومش عارف إيه وبيحيونى على أدائي وتمثيلي وشواهد كتير بتقول إني بعرف أمثل.. واللي يقهر السؤال اللي مش عارف ليه يتوجه لي أنا لما بيقولوا لي أنت ليه مقل في أعمالك؟؟ ده احنا بننتظر مشاهدك وشغلك.. أو أنت ليه ما بتعملش سينما؟.. أو أنت إزاى مابتاخدش مساحات أكبر من كده؟ زي ما يكون أنا اللي مابشتغلش بمزاجي.. والأسئلة اللي بطرحها للمنتجين والمخرجين.

وتابع: أنا اسمى تامر فرج ممثل وسيناريست.. هل ممكن أمثل أو أكتب عشان أنا موهوب فقط مش عشان عندي عدد فولورز كتير على السوشيال ميديا؟.. هل ممكن أمثل أو اكتب بموهبتي وأنا راجل ما بحبش أتنطط في خروجات وكافيهات وسهرات وتجمعات وبفضل إني أقعد في بيتي مع أسرتي اكتب واشتغل على نفسى في التمثيل؟.. هل ممكن أمثل أو اكتب بموهبتى من غير ما اتلزق فى مهرجانات وحفلات لأنى ما بحبش اروح أي حدث فنى غير لما أكون معزوم بجد ومرغوب فى وجودى ؟؟؟.. هل ممكن أمثل أو اكتب بموهبتي من غير ما اقعد استعض نفسى وصوري على الانستجرام واكتب صباح الخير وجمعة مباركة وإيه رأيكم فى اللوك الجديد أو أفضل أسوق نفسى بصوري فى الجيم وأنا اتصبب عرقا وأفرز عضلات من كل حته فى جسمي؟.

واختتم بقوله: الحل الوحيد للتواجد عشان المنتجين والمخرجين يفتكروني، لكن أنا للأسف ماتربيتش كده واتربيت على احترام أهل بيتى وإنى اشتغل بموهبتي مش بتواجدي وخلاص، ويوم ما هستخدم السوشيال ميديا هستخدمها لنشر الوعى وتقديم محتوى مش عشان اسوق لنفسى، هل ممكن اتعرف بشغلى ولا لازم اتعرف بالسوشيال ميديا؟.. هل ممكن أمثل أو أكتب بموهبتي مش عشان أنا من شلة فلان أو صاحب فلان؟؟؟ مع العلم أن الوسط كله أصحابي لكن أنا مبعرفش أفضل أبعت للمخرج فلان والمنتج علان تحياتي وسلاماتي وبوستات عيدكم مبارك وصباح الرضا، ومع العلم أن أخويا المخرج العبقري أستاذ وائل فرج، ومع ذلك ما بيقدرش يجيبني في أعماله أحيانا لأن جهة الإنتاج مش موافقة!..مش عايز ردود تعاطف، واللي عايز فعلا يساعدني يساعد أن البوست ده يوصل أو يمنشن حد من الوسط يكون عنده إجابات.. ولا نعتزل ونشوف حاجة تانية؟

كريم الحسيني

 وفي يوم الجمعة الموافق 7 أكتوبر الجاري، أعلن الفنان كريم الحسني، عن غضبه من عدم مشاركته في الأفلام السينمائية، مؤكدًا أنه يفضل السينما لأنها مخلدة، ويتمنى أن يكون مثل الفنان عادل إمام والفنان أحمد زكي.

وكتب كريم الحسيني منشورًا عبر حسابه الشخصي بموقع فيس بوك: “أنا تعبت بجد، جبت آخرى وطاقتى خلصت، ورغم إنى الحمد لله بشهادة الجميع فى عز توهجي على خشبة المسرح اليومين دول، وفى عز توهجي كمدرب تمثيل ودوبلاج وتمثيل إذاعي سواء على مستوى الورش أو على مستوى التدريس في الجامعة، لكن برضو من حقي أنا أقول أنى تعبت”.

وواصل كريم: “ما بقتش قادر أتحمل، عارف أنى في نعمة، لكن أنا ممثل والله ممثل، بحب السيما والڤيديو واللعب بالشخصيات المتنوعة، بحب السيما عشان مُخلدة”.

وتابع الحسيني: “احنا لحد دلوقتِ بنتفرج على أفلام أستاذ فؤاد المهندس والريحاني ومدبولي أكتر ما بنتفرج على مسرحياتهم”.

نعيم عيسى 

وفي وقت سابق، خرج الفنان الكبير نعيم عيسى ليتحدث عن معاناته مع الحياة وضيق الحال بعد أن نسيه المخرجون وتجاهلوه في أعمالهم الفنية.

وفي لقاء سابق مع الإعلامي عمرو الليثي ببرنامج “واحد من الناس” على شاشة قناة الحياة قال الفنان الكبير إنه يعيش في شقة إيجار جديد يدفع لها شهريًّا 1200 جنيه، وينفق على علاجه 2000 جنيه بينما المعاش الذي يتقاضاه من نقابة المهن التمثيلية لا يكفي.

وأضاف: "بقالي أكثر من 10 سنين قاعد من غير شغل، ويدوبك عايش على المعاش ومش بيكفيني، وبميل على ولادي، لما الأمراض جات لي".

وتابع: "تعبان ببطني وظهري وصدري، وأصبت بجلطة في رجلي وجلطة في قلبي، وركبت دعامتين، وغيَّرولي الشريان التاجي، وشالوا المياه البيضا من عينيا، وركبولي عدسات، قاسيت كتير ولسه رجلي بتوجعني".

وعن ظروفه المادية أكد عيسى: ”شقتي إيجار جديد بـ1200 جنيه في الشهر، وبجيب علاج بـ2000 جنيه كل شهر، وأصلًا المعاش لا بيكفي ده ولا ده، وحاسس بحسرة كبيرة، ليه انتهيت مريضًا ونائمًا في البيت، ليه مش بخرج وأمثل، ليه محدش بيبعت لي وزملائي والمخرجين مش بيزوروني؟“. 

وأكد: ”بتفرج في التلفزيون وبشوفهم بيكرموا فنانين كتير، ولا حد فكَّر يكرمني.. أنا مظلوم، ليه مفيش حد بيبعت لي شغل، والنقيب ليه مش بيزورني أو يبعتلي حد من الفنانين يزورني؟!“.

عادل الفار

 ومن الفنانين الذين عانوا من قلة المشاركة في الأعمال الفنية الفنان عادل الفار بالإضافة إلي أنه  قد تعرض لأزمة  صحية شديدة في العام الماضي دخل على إثرها المستشفى وظل يرقد لفترة في العناية المركزة.

يغيب عادل الفار أيضًا عن الأضواء والتمثيل منذ فترة طويلة ومرت عليه ظروف مادية صعبة خلال فترة مرضه لكن الفنان أشرف زكي ونقابة المهن التمثيلية لم تتركه في محنته ووقفت بجانبه.