بيحل الكلمات المتقاطعة وبيلعب مع كلبه.. رامي إمام يكشف كواليس جديدة عن حياة الزعيم
ردَّ المخرج رامي إمام على الشائعات التي ترددت الفترة الأخيرة حول إصابة والده الزعيم عادل إمام بمرض الزهايمر.
شائعات عادل إمام
وقال خلال لقائه ببرنامج "الحكاية" الذي يقدمه الإعلامي عمرو أديب بقناة "mbc مصر": "اتعودنا على كثرة الشائعات عن عادل إمام من زمان جدًّا، وأصبحت جزءا من حياتنا حتى أنا ومحمد وسارة اتعودنا عليها من صغرنا".
صحة عادل إمام
وأكد: "عادل إمام زي الفل وبيستمتع بحياته مع أولاده وأحفاده، وبيقول لي هات لي موضوع بس يكون عاجبني ويناسبني، ومش هيعمل حاجة إلا لما يكون مقتنعًا بها".
شرط عادل إمام للعودة للتمثيل
وأضاف: "عادل إمام قال لي أنا عملت كل حاجة في الحياة، ومش هشتغل حاجة إلا لو كانت مهمة ومختلفة وأقتنع بيها، ولحد النهاردة بتكلم معاه على شغل وأنا مدرك إن صعب جدًّا أني انتقى موضوعًا للزعيم".
طلب غريب لعادل إمام
ولفت: "من شهرين قال لي نفسي يكون عندي كلب فجيبنا له كلب صغير وقاعد بيلعب معاه ومبسوط بيه، وهو مستمتع بحياته جدًّا".
استمتاع عادل إمام بحياته
وتابع: "عادل إمام ماشفناش في حياته كتير بسبب ارتباطاته بالتصوير، وأمي شالت وشافت كتير، ومن حقه يقعد يستمتع بحياته مع أولاده وأحفاده، وينتقي الموضوع الفني اللي يشارك فيه".
يوميات عادل إمام
وأشار: "عادل إمام بيتابع كل حاجة بتحصل، ولحد دلوقتي بيقرأ كل الجرائد، وبيحل الكلمات المتقاطعة بالقلم الفلوماستر".
مصير فيلم "الواد وأبوه"
وأوضح: "فكرة فيلم "الواد وأبوه" جاءت لما الزعيم قال أنا عايز أعمل فيلم مع محمد إمام ولكن الفكرة لم يحدث فيها تطور لترتقى أنها تتنفذ".
أعمال الفنان عادل إمام
ولفت: "الزعيم عادل إمام عمل حوالي 155 فيلما، وكلهم علامات، ومن 2010 إلى 2020 مسلسلات، وهي مهلكة لأي فنان".
