بسنت فراشة التيك توك بعد الهجوم عليها: أنا مش قليلة الأدب.. ونفسي أكون زي ياسمين عبد العزيز | فيديو

موجة انتقادات لاذعة طالت الطفلة بسنت عمرو صاحبة الـ 8 سنوات المعروفة بفتاة التيك توك، أو مثلما يطلق عليها البعض فراشة التيك توك، وذلك بعدما ظهرت مع الإعلامية ريهام سعيد منذ عدة أيام حيث تداول مستخدمو موقع التواصل الاجتماعي فيسبوك مقطع فيديو للطفلة من الحلقة، واصفين إياها بأنها تتحدث بطريقة غير لائقة، وفي دقائق معدودة أصبحت فراشة التيك توك تريندًا عبر مواقع التواصل الاجتماعي.

كاميرا “ فيتو” التقت الطفلة بسنت في حوار وكانت إجابتها ممزوجة بالتلقائية قائلة ردًّا على الانتقادات التى وجهت إليها بعد لقائها الإعلامي الأخير: "أنا أحب أقول  لكل من انتقدني بشكل مسيء إنهم ييزعلوني من الكلام اللي هما بيقولوه، أنا (بعيط) لما بشوف الكلام بتاعهم، وبستغرب جدًّا من كل من يكتب كلمة وخلاص محدش يعرف انعكاس الكلمة غير لما يقرأ الكلام ده ويجرب ممكن يتعب نفسيًّا بسببه إزاي".

الموهبة بتاعتي 

وأضافت قائلة: "أنا عايزة بس أوصل لكم الموهبة بتاعتي، أنا مش قليلة الأدب ولا حاجة زي ما البعض يدعي، أنا بعمل حاجات حلوة كتير أنا كله بيقول عليَّ ذكية ومتفوقة في دارستي وبحل واجباتي بالمدرسة".

وعن محتواها الذي تقدمه على صفحات التواصل الاجتماعي  قالت: "أنا متربية كويس وعارفة يعني إيه قلة الأدب بس أنا بعمل تمثيل اللي هو تمثيل كوميدي أنا قلت لعمو خالد النهارده يا عم خالد نزل البوست النهارده أنا مش مسامحة اي حد بيشتمني.. أنا عملت لكم إيه عشان تشتموني بس أنا بردو هاخد حقي عند ربنا".

نفسي أكون زي ياسمين عبد العزيز 

وعن دراستها استكملت بسنت قائلة: "أنا ذكية وبروح المدرسة ويستثمر ذكائي في حاجة أنا بحتاجها يعني مثلًا بستغله في الواجب خلال الدراسة وفي حاجات زي كدة.. يعني التمثيل دا حاجة زي اللعب عادي أنا موهبة كبيرة ونفسي اطلع كمان زي الممثلين".

وأوضحت الطفلة أنها بسبب عشقها للتمثيل تعشق النجوم، وأضافت: "نفسي أكون زي ياسمين عبد العزيز وأعمل أفلام وأشوف نفسي على التلفزيون، وأنا عندما أرى نفسي على التلفزيون بكون مبسوطة وفرحانة ولو حلمي اتحقق أبقى عملت كل حاجة في حياتي".

محمد رمضان متكبر

وفيما يخص تعليقها على محمد رمضان بأنه فنان متكبر قالت: "أنا شايفة أن هو متكبر عمال يقول أنا نمبر 1 أنا نمبر1 والمفروض الجمهور هو من يحكم عليه، أنا بحب أفلامه وبحب أغانيه لكن الجماهير هي من تقول من نمبر 1".

السلبيات والكومنتات

ومن جانبه قال خالد رشاد عم الطفلة بسنت: "السلبيات والكومنتات وصلت لبسنت والتجريح والشتيمة فهي زعلت واتضايقت وقالت همَّ بيشتمو ليه أنا زعلتهم في إيه هما ليه بيعملوا معايا كدة".

ووجه عم بسنت رسالة لمنتقديها: ياجماعة في الأول والآخر هي طفلة هي لا تسيء لأحد ولا بتشتم حد هي مش بتعمل حاجة غلط كل دا شو قدام الكاميرا".

وأوضح قائلًا: "هي عاوزة تمثل هي عندها موهبة أنتم ليه مش فاهمين دة هي في الاخر طفلة محترمة وبتحترم الكبير والصغير، ولكن  ممكن تغلط زي أي طفلة".

وأوضحت الطفلة بسنت أنها لن تغير المحتوى الذى تقدمه على مواقع التواصل الاجتماعي بعد حملة الهجوم عليها في الفترة الأخيرة قائلة وهي تبكي:"ليه  أغير المحتوى، انا  بقدم المحتوي الخاص بيا، للجمهور اللي بحبه، أما السلبين فحسابهم عن ربنا".