محمد عشوب: أنا شاهد على وجود زوجة وابن لـ"سمير صبري" | فيديو
قال الماكيير محمد عشوب: "الفنان الراحل سمير صبري كان جاري في نفس العمارة لـ30 سنة، وقبل ما يموت بشهر كنت رايح الشركة عندي وهو كان نازل، وقال لي: عايز أبيع المكتب وشوف لي حد يشتريه بأفلامه وبكل حاجة موجودة فيه.. بس ياريت بسرعة، قلت له هسعى وأشوف.. بس بصراحة مهتمتش وسافرت".
الأزمة الصحية لسمير صبري
وأضاف خلال لقائه ببرنامج "تقدر مع الغيطي" الذي يقدمه الإعلامي محمد الغيطي بقناة "الشمس": "لما رجعت من السفر لقيت سمير صبري بيمر بأزمة صحية وزرته في المستشفى ومكلمنيش عن بيع المكتب تاني".
زوجة وابن سمير صبري
وأكد: "سمير صبري له ابن من زوجته الإنجليزية وإحنا شُفناها لأن أنا كنت معاه في الوقت ده في لندن، لما مشي من التليفزيون المصري وكان معانا المخرج محمد عبد العزيز، وابتدينا نعمل مسلسل هناك من إنتاجه، وقتها اتعرف على زوجته الإنجليزية واتجوزها هناك، وأنجب منها ابنه اللي هو طبيب، ولحد دلوقتي محدش عارف إيه سبب عدم ظهور ابنه، وورث سمير صبري ذهب لأولاد خالته".
من جانب آخر، قال المنتج صفوت غطاس عن علاقته بالفنان الراحل سمير صبري: إن علاقته بالفنان الراحل امتدت لـ40 عامًا، وجمعت بينهما علاقة قوية وجمعتهما عدة رحلات للخارج.
ابن سمير صبري
وعن الجدل الذي أثير الفترة الماضية حول ابن سمير صبري، علق صفوت غطاس: "لفيت مع سمير صبري العالم كله وعمره ما ذكر ليَّ إنه عنده أولاد أو أنجب، وما سألتهوش إذا كان متجوز ولا لأ".
وتابع: "خلال استضافة سمير صبري في أحد البرامج التلفزيونية تم سؤاله إذا كان متزوجًا ولديه أطفال من عدمه، وكانت إجابته أنه تزوج من أجنبية أو إنجليزية وأنجب منها طفلًا، وهذا كلام أعتقد أنه غير دقيق، خاصة أننا سافرنا معًا لندن أكثر من 10 مرات، ولم يزر فيها نجله أو يبلغني بوجود ابن له في لندن".
