عضو مجلس إدارة الأهلي يكشف تفاصيل إصابته.. ويوجه رسالة حزينة لمتابعيه
كشف محمد سراج عضو مجلس إدارة النادي الأهلي، تفاصيل إصابته بعد تعرضه لحادث بالسيارة خلال الأيام الماضية.
وقال سراج عبر حسابه بموقع التواصل الاجتماعي فيس بوك: الحمد لله قدر الله وما شاء فعل وشكرًا جزيلًا لكل الاتصالات والرسائل والبوستات على مدار اليومين الماضيين وبعتذر للجميع لعدم القدرة على الرد والكتابة لوجود كسر في اليد اليمنى والأنف وكدمات شديدة بالصدر والركبة ولكن قدر ولطف الحمد لله انها جت على كده والحمد لله حالة اسلام الشاب الجميل المصاب في العربة الأخرى واللي سائقها كان سايق بدون رخصة وواقف في تاني حارة بطريق سريع ويتحمل جزء من الخطأ في تحسن وأنا متابعه يوميًا ومتكفل بحالته بالكامل لحد ما يقوم بالسلامة وربنا يحفظ ويشفي الجميع.
وأضاف: حقيقي المحن والأزمات بتظهر معادن ناس كتير والفترة اللي فاتت والسنة دي عامة هي الأسوأ ليا في كم الأزمات والتقلبات النفسية اللي تعرضت لها سواء على المستوى الشخصي واللي دمرني نفسيًا وبقيت واحد شبه تايه ومليش نفس او شغف لأي شيء بالحياة أو المهني كمان سواء بعملي الخاص أو بالنادي ولكن الحمد لله أنا عارف نفسي كويس وواثق منها جدًا وعنيد وقبل كل ده ثقتي بالله أكبر من أي حاجة تانية وعارف أني لما بقع بقوم أقوى بس وقتها مش كله هيبقى له مكان زي الأول عندي
وواصل: في ناس اول ما بتشوف انك بتوقع في كام حاجة بتكون أسرع الناس في التخلي عنك وفي الشماتة مش عارف ليه رغم انها كانت من أقربهم وكانت دائمة السعي للتقرب منك بقوة وبأي شكل طبعًا أنتوا عارفين نفسكم كويس وفي ناس بنت أصول ودول الغالبية في حياتي بفضل الله شكرًا لكل اللي فهم ده وحس بيا في الفترة دي اللي خلاص انتهت بالنسبالي بكل السوء اللي فيها مش هستسلم او أكون آسير لها تاني شكرًا لكل اللي وقف من قلبه معايا بجد وبوضوح وبدون نفاق وبحب وخوف حقيقي حتى لو بمجرد رسالة أو كلمة عشان دول هيفضلوا على رأسي طول عمري.
