غراب البين يكتب: الكورة مش فى الملعب
بعد يوم طويل من اللف والدوران قررت أن أريح جتتى فى منطقة هادئة فأخذتنى أجنحتى إلى منطقة الجبلاية فتوقفت فوق سور إتحاد كرة القدم وانكمشت بين أجنحتى وحاولت أن أغمض عيناي إلا أننى سمعت صوت حوار بين شخصين من البنى آدمين كانوا فى طريقهم للخروج من إتحاد كرة القدم ويقول أحدهم للآخر: طب أدينا جبنا الخبير التحكيمى "كلاتتينبرج" من اليونان لما نشوف آخرتها مع بتوع الأهلى والزمالك؟
فرد عليه صاحبه قائلا: بس متنساش إن الخبير مش هيقعد معانا لأنه متعاقد مع الإتحاد اليونانى لتطوير التحكيم فى بلده بالإضافة إلى أن أخونا "عصام عبد الفتاح" رئيس لجنة التحكيم مش طايق أمه.
وهنا لم أستطع أن أكمل سماع الحوار فوقفت على قدماى وفردت أجنحتى وأخذت أنعق بأعلى صوتى "قاق قاق" فراح الرجلان يهشوننى ويقولون لى غور من هنا يا غراب البين جبتلنا النكد والفقر.. فهربت طائرا قبل أن يحدفوننى بالطوب ولسان حالى يقول: بقا أنا اللى جبتلكم النكد والفقر يا شوية بمى آدمين أم أنكم من تنكدون على جمهورية مصر العربية بأكملها؟
أنا مش عارف الإتحاد بتاع الكورة دا بيدير اللعبة إزاى.. يجيب مدرب عالمى للمنتخب ثم ينهى التعاقد معه ويتعاقد مع مدرب محلى ثم ينهى التعاقد معه ويعود لكيروش العالمى فيرفض كيروش لأنه لا يستطيع أن يعمل فى هذا المناخ العشوائى.. ثم يتعاقدون مع خبير تحكيمى متعاقد أصلا مع منتخب آخر يعنى هييجى مصر زيارات ويلهف الدولارات وكأنك يا أبو زيد ما غزيت
دا بالإضافة إلى مواعيد الدورى اللى مش بنعرف هينتهى إمتى ولا هيبتدى إمتى.. وكمان جايبين مدرب للمنتخب بيلهف مليون جنيه فى الشهر مقابل مشاهدة ماتشات الدورى ولسه أصلا مشافش اللاعيبه ومش عايز يشوفهم أصلا.. ياخى جاتها ستين ألف نيلة اللى عايزه تخلف بنى آدمين زيكم مش عارفين هما موجودين فى إتحاد الكرة ليه.. لدرجة إن الكورة أصبحت مش فى الملعب... الكورة أصبحت عبارة عن مكايدات ومناوشات بين مجموعة الإعلاميين الرياضيين اللى رزقنا بيهم ربنا كلا فى قناته لا يتحدث فى فنون الكرة بقدر ما يشعلل نار الغيرة بين جماهير ومسئولى الأندية.
