سر السجاير.. أقوال مثيرة لشاهد في قضية الريف الأوروبي | مستند
تنظر محكمة جنايات الجيزة، السبت المقبل، ثاني جلسات محاكمة المتهم بقتل 5 أشخاص في مزرعة بالريف الأوروبي بمدينة الشيخ زايد.
واستجوبت النيابة أحد الشهود في الواقعة "و. م"، سائق ويبلغ من العمر 43 عامًا، وحصلت فيتو على نص أقواله والتي جاءت كالتالي:
س| ما طبيعة عملك تحديدا؟
ج| انا شغال غفير في مزرعة في الريف الأوروبي وعندي عربية سوزوكي بشتغل عليها مشاوير مخصوص بالطلب.
س| وما هي علاقتك بالمتهم عاطف ؟
ج| انا مليش علاقة بيه.. بس هو بيكلمني في التليفون ويطلب مني أوصلة لمشاوير وأخد حسابي منه.
س| ومال هي ظروف تقابلك مع المتهم/ عاطف في يوم الأربعاء الموافق 25/5/2022 ؟
ج| هو في اليوم ده كلمني الصبح حوالي الساعة 11 الصبح وقالي تعالي عشان توصلني السوق في أكتوبر ولما روحت له ركب معايا وروحنا السوق.. ولما وصلنا السوق هو دخل السوق وانا روحت عشان أصلي الظهر ولما خلص جالي عند العربية وركب معايا ومشينا.. واحنا راجعين عدينا علي سوبر ماركت اشتري منه شوية حاجات "جوافة وبيبسي" وعدينا علي صيدلية عشان يشتري دوا ليه.. ولما دخل الصيدلية رجع قالي ان الدواء شاحح ومش موجود وعاوز اروح صيدلية تاني.. وبعد كدة انا عديت اشتريت هياكل فراخ للكلاب عندي في المزرعة اللي انا شغال فيها.. واحنا راجعين قالي عدي علي أبو غالب علشان نشتري شوية حاجات من هناك ولما وصلنا ابو غالب دخل سوبر ماركت اشتري منه جوافة وبيبسي وشوية حاجات تاني وقالي عاوز صيدلية تاني وروحنا صيدلية تاني وقالي انه ملقاش الدوا وعدينا علي صيدلية تالتة وملقاش الدوا وبعد كدة واحنا ماشيين وقفني عند صيدلية ونزل من العربية ودخل جوه وبعد كده رجع ومعاه كيس معرفش فيه ايه ولما ركب مشينا ووصلته للمزرعة بتاعته في الريف وانا روحت.. بعد كده بليل حوالي الساعه 11 ونص تقريبا لقيت عاطف بيتصل بيا وبيقولي تعالي عشان تطلعني بره عشان محتاج اروح البلد دلوقتي ضروري ولما روحت له وركب معايا كان قالي ان الناس عندي في البلد قاموا علي بعض وانه عاوزني اوصله الموقف في المنيب.. روحت رفضت عشان انا مينفعش اتاخر علي المزرعة.. راح قالي طب خلاص وصلني للمحور.. وفعلا وافقت ووصلته للمحور.. واحنا في العربية كان بيشرب سجاير كتير ولما وصلته تحت الكوبري اداني 200 جنيه وسبته ورجعت نمت وهو ده كل اللي حصل.
إحالة المتهم للمحكمة
وفي وقت سابق، أمرت النيابة العامة بإحالة المتهم بقتل ٥ أشخاص في مزرعة بالريف الأوروبي للمحاكمة الجنائية، وذلك لاتهامه بقتل المزارع عمدًا، واقترنت تلك الجناية بخمس جنايات آخر هي قتل ابنتيه وحفيديه عمدًا، والشروع في هتك عرض إحدى ابنتيه المجني عليهما.
وكانت النيابة العامة أقامت الدليل على المتهم من إقراره في التحقيقات، وما أجراه من محاكاة تصويرية لكيفية ارتكاب الجريمة، وإرشاده عن شريط المادّة المخدرة التي استخدمها لتنفيذ مخططه في هتك العرض.
كما أرشد عن الأدوات التي استخدمها لدسِّ المخدِّر في شراب المجني عليهم، وما أسفر عنه تقرير المعمل الكيماوي بمصلحة الطب الشرعي بفحص تأجيل المادة المخدرة، وتقرير الصفة التشريحية الخاص بجثامين المجني عليهم الخمسة، وكذلك ما أسفر عنه تقرير الإدارة العامة لتحقيق الأدلة الجنائية بفحص كافَّة الآثار المضبوطة بمسرح الواقعة، وإجراء المطابقات اللازمة، فضلًا عن أقوال تسعة شهود في التحقيقات.
