يا "مزاج" النور !!
أسماء المسلسلات بقت مقصودة تلعب بينا كورة.. الركين دي مش بتفكرك بحاجة.. يعني أول ما بتسمعها كدة أو بتشوف اسم المسلسل على التليفزيون وبتشوف شخصية "عبد المغني" بتحس بإيه ؟ ما بيجيلكش إحساس أن اللي حاطط الاسم درس شخصية من شخصيات الخلايا النائمة وحاول يحط الاسم على مقاسها.
طيب يعني و"حكاية حياة" و"حكاية بنت اسمها ذات" ومسلسل "ليلي" اللي مش عارفة تتجوز دي.. منكدين على بنات مصر كلهم وكل واحدة شايفة نفسها في شخصية وكله كوم بقي وذات دي كوم خالص.. دي مش منكدة على البنات بس لا دي كمان منكدة على الأمهات اللي حاسين انهم عاشوا في نفس الزمن واتعمل فيه نفس اللي بيحصل معاها ودلوقتي قاعدين يتفرجوا ويجيبوا علبة المناديل جمبهم.
وكل واحدة قاعدة بقي مستنية المسلسل اللي فيه حكايتها.. اللي أهلها ظلموها تقرب علبة المناديل جمبها وقت مسلسل حياة.. واللي نفسها تتجوز تخطف علبة المنديل أول ما تسمع صوت تتر مسلسل ليلي.. واللي عاشت زمن جمال والسادات وما بعدهم وهي شابة بتستني ذات عشان تفتكر شبابها اللي راح هدر وساعتها لا يمكن حد يقدر يقرب من علبة المناديل غيرها.
وفيه ناس بقي صاحبة مزاج.. سايبة كل ده واعدة بتتفرج على معبود نساء مصر.. صاحب الأربع ستات اللي غلب الحاج متولي في "مزاج الخير" وأول ما يظهر ع الشاشة فيه بنات كتيرة بيبقي نفسها تقوله.. يا مزااااج النوووور
بس ولو "النور" يعترض ع الوزارة.. يشيل الست بتاعة الفلوت ويجيب مكانها علبة كبريت.. مش هيحصل أبدا إننا هنمشي على مزاجه.. حتي لو طلعت مظاهرات الستات فيها تهتف "مزاج النور" !
