غراب البين يكتب: ملوك التسريبات

منذ أيام وبينما كنت واقفا أعلى سور مدرسة أم المؤمنين الثانوية العامة لأستمتع بظل الشجرة التى ترمى بفروعها فوق رأسى.. وإذا بى أسمع هرجا ومرجا فى حوش المدرسة فأدركت أن الطلاب إنتهوا من أداء الإمتحانات.
 

طالبان يضع كل منهما ذراعه على كتف الآخر، وصوت ضحكاتهم يملأ المكان.. يقول أحدهما: أنا قفلت الامتحان بفضل الله.. فيرد عليه زميله: ربنا يباركلنا فى التسريبات.. وطالب ثالث يأتي من خلفهم قائلا: يا عم هى فين التسريبات دى.. أنا ما شفتش حاجة.. فيرد عليه أحدهم ضاحكا: علشان انت ملكش فى التكنولوجيا يا مان.
 

وهنا وقفت على قدمى ونفشت ريشى وأخذت أنعق بأعلى صوتى "قاق قاق" فراح الطلاب يهشوننى ومعهم أولياء أمورهم الذين ينتظرونهم خارج المدرسة ويقولون لى "غور من هنا يا غراب البين جبتلنا النكد والفقر.. وقبل أن يحدفوننى بالطوب كعادتهم هربت طائرا من المكان ولسان حالى يقول: بقى أنا اللى جبتلكم الفقر يا شوية بنى آدمين؟!.. دا انتم الفقر والنكد نفسه
 

يعنى الدولة والحكومة ووزير التعليم طالع عينه فى تطوير التعليم وإشى تابلت وإشى بوكلت وإشى شبكات نت ومليارات بتتصرف علشان تتعلموا وتواكبون العصر فإذا بكم تتفننون فى الغش وتطلقون على بعضكم ملوك التسريبات؟.. ياخى جاتها ستين ألف نيله اللى عايزه تخلف بنى آدمين زيكم ملهمش غير فى الغش والتسريبات!