إكرامي يرفع علم الأهلي على الهواء: شعاره مش ممكن يقع.. وهذه نصيحتي للاعبين | فيديو
رفع الكابتن إكرامي الشحات، حارس مرمى النادي الأهلي ومنتخب مصر السابق، علم الأهلي على الهواء، قائلًا: "الشعار ده مش ممكن يقع".
نصيحة إكرامي للاعبي الأهلي
وأضاف خلال لقائه ببرنامج "اللعيب" الذي يقدمه الإعلامي مهيب عبد الهادي بقناة "إم بي سي مصر": "لازم لاعيبة الأهلي تبعد عن السوشيال ميديا، وجمهور الأهلي يلتف حواليها علشان نتخطى الأزمة، وأنا عارف أنى هتهاجم من المغرضين اللى عايزين النادي الأهلي يقع بعد الكلام اللى بقوله، وأنا بقولهم الأهلي عمره ما هيقع إن شاء الله".
تخطي الأهلي أزمة الانكسار
وتابع: "الأهلي قادر يكون أحسن، وإحنا متعودين طول عمرنا في الأهلي أننا بنعرف نلم بعض كويس سواء مجلس إدارة أو جهاز فني أو لاعبين والداعم لهم جمهور الأهلي".
دعم جمهور الأهلي
وأضاف: "جمهور الأهلي هيلتف حول مجلس الإدارة والجهاز الفني واللاعيبة، والنادي وهيخرج من الأزمة اللى إحنا فيها بخسارتنا كأس مصر، والقادم أفضل".
مشكلة السوشيال ميديا
وأكمل: "إحنا بنعرف نكمل بعض كويس أوي ونعدى أي خسارة، ومش عايزين ناخد كلام السوشيال ميديا، وتقريبا ثلاثة أرباع ما ينشر عليها مش صحيح وبناءً على عضو مجلس إدارة يلمح بالاستقالة هذا غير صحيح ولا يمكن أن نعتد به لأنه ظهر على السوشيال ميديا".
الهجوم على الخطيب
ولفت: "الفترة اللي جاية هنلاقي هجوم شنيع بالسوشيال ميديا علي النادي الأهلي ومجلسه وعلى محمود الخطيب بالذات وهيحصل هجوم شديد على الخطيب والمجلس والجهاز الفني، ولكن اللى أنا متوقعه أن جمهور الأهلي الوفي قادر يخرج الفريق من اللى هو فيه، والفئران هتطلع من الجحور دلوقتي وتطلع تهاجم فلازم ننسى السوشيال ميديا، وأتمنى من لاعيبة الأهلي محدش يفتح تليفونه ويتابع السوشيال ميديا".
وأثنى علاء مبارك، نجل الرئيس الرحل حسني مبارك، على أداء نادي الزمالك أمام الأهلي والفوز بكأس مصر، بعد تغلبه على على غريمه التقليدي الأهلي بثنائية مقابل هدف.
وقال علاء عبر حسابه الرسمي على "تويتر": "يستحق نادي الزمالك هتاف "يا زمالك يا مدرسة لعب وفن وهندسة" شوط أول رائع للزمالك ألف مبروك على الفوز بالكأس وهارد لك النادى الأهلي فريق كبير".
وتُوج الفريق الأول لكرة القدم بنادي الزمالك ببطولة كأس مصر للموسم الماضي، بعد الفوز على الأهلي بهدفين مقابل هدف في المباراة النهائية التي أقيمت بينهما بإستاد القاهرة الدولي، ليجمع أبناء ميت عقبة بين بطولتي الدوري والكأس للموسم المنقضي.
وتقدَّم الزمالك بثنائية نظيفة في الشوط الأول عن طريق أحمد سيد زيزو وإمام عاشور، قبل أن ينجح حسام حسن في تقليص الفارق بالهدف الأول مع بداية الشوط الثاني.
