الحزن يخيم على أصدقائه.. حكايات مؤلمة عن القبطان المصري المفقود | فيديو
خيم حزن شديد على أصدقاء القبطان المصري سامح سيد، الذي فُقد في عرض المحيط الهندي، ودشن أصدقاء سامح وعدد من نشطاء مواقع التواصل الاجتماعي هاشتاج "عاوزين سامح عايش أو متوفي"، وآخر بعنوان "حق سامح"، وتداول النشطاء مقاطع فيديو للثقوب التي كانت في السفينة المتهالكة، التي كان على متنها سامح ورفاقه، وبعض الأحاديث المتداولة بينه وبين أصدقاءه عن أزمة السفينة المتهالكة.
بحزن شديد حكي أصدقاء القبطان المفقود سامح سيد قائلين "إنه شاب من محافظة الفيوم، درس في الأردن في الكلية البحرية، ولسامح شقيقة واحدة وأم تعبت في تربيته بعد وفاة والد سامح، فقد كان سامح يتيم الأب، وهو مفقود في المحيط الهندي منذ 6 أيام تقريبًا، على مركب سوري".
وبرسائل مؤثرة نشرها أصدقاء سامح عبر موقع التواصل الاجتماعي في بوك قالوا: "آخر رسايل من سامح لأصدقائه وأهله إن السفينة بها عطل "أتخرمت"، ولحد هذا الوقت أهله ميعرفوش عنه أي حاجة."
حكاية فقد القبطان المصري
بداية حكاية فقد القبطان المصري سامح سيد كتب عنها أحد أصدقاءه محمود رجب الجبيلي عبر الفيس بوك فقال: "اخويا مفقود في عرض البحر ومحدش بيتحرك.. حق اخونا وصاحبنا القبطان سامح سيد شعبان كامل خريج دفعة ٢٠٢٠/٢٠٢١ من الأكاديمية البحرية الأردنية شاب من الشباب المحبوبة والفئة المتوسطة داخل محافظة الفيوم دخل الكلية زي أي حد واتخرج وجه اخد شغل علي مركب تجارية سافرت بيه شهر ٢ بيتواصل معانا كل فترة من الفترات عادي".
وتابع الجبيلي: "الشهر اللي فات بعتلنا ان المركبة اتخرمت وبايظة والناس مش عاوزين ينزلوهم ومكملين بيهم وبيلحموا السفينة طبعا اتجاههم ركبوا من اليابان وبعدين راحوا كوريا والصين المهم كذا بلد لحد جزر المالديف والسفينة اتخرمت طبعا وعملوها وتتخرم المهم ان سامح مصورلنا كل حاجة صوت وصورة والمركب بتدخل مياه".
وأضاف محمود الجبيلي: "جم يوم ٢٠ /٦ عملوا مشاكل مع القبطان وراجعوا واحد مصري من الاسكندرية من كتر المشاكل اللي عملوها يوم ١٤ /٧ غرقت المركب كانوا ١٢ واحد في المياه نزلوا في زورق في المياه في نص المحيط الهندي".
وقال "عملوا استغاثة من أقرب سفينة ليهم كانت على بعد ١٢ ساعة منهم بعد ساعة من غرق السفينة وقع سامح من على الزورق في المياه والموج اخده بعيد عن الزورق حاول صاحبه القبطان محمد جمال يلحقه بس للاسف البحر اخد الاتنين كانوا لابسين لايف جاكيت وبعدوا عن المركب".
وجع قلب
أما محمد صالح، صديق سامح سيد، فأكمل الحكاية عبر الفيس بوك قائلًا: "بعد ١٠ساعات من الحادث الزورق باظ وبعدها بساعتين السفينة جت اخدت الـ ١٠ الفاضلين من الـ ١٢ شخصا اللي كانوا على الزورق.. سامح ومحمد مش موجودين ولا لقيوا حتي جثثهم مش طالبين غير ان الناس تقف معانا عاوزين صاحبنا واخونا حتى لو جثته يا جدعان ساعدونا اللي يعرف حد يكلمه الراجل ده ولد وحيد امه وامه بتموت عليه لا عارفين هو عايش ولا ربنا توفاه #عاوزين سامح عايش او متوفي #حق#سامح".
وقالت إسراء الفقي "سامح سيد شاب مصري خريج اكاديمية بحرية بالاردن كان في سفينة بالمحيط الهندي ورغم ان السفينة حصل فيها ثقوب الا انه تلقي اوامر باستكمال الرحلة لحد ما اتحركوا وركبوا زورق سوري كانوا 12 شخص ولكن سامح وقع و المياة بدأت تسحبه ونزل صديق ليه لانقاذه بس المياه اخدتهم لبعيد عن الزورق وتم ارسال سفينة وتم إنقاذ ال 10 اشخاص ولحد الوقت ده محدش اتوصل لـ سامح وصديقه سواء هو حي ام ميت.. فربنا ينجيه لو لسه حي ويرحمه لو اتوفي. ولازم حقه يتجاب من كل شخص مسؤول عن الإهمال ده ارواح الناس مش رخيصة كده".
وأكمل مصطفى أبو المجد، صديق القبطان المفقود، فقال "رجعت للشات لقيته بيقولي هدخل شرطه بس كان ميعرفش انه هيكون قبطان قد الدنيا ويحقق حلمه مكنش هيعرف انه هيجي يوم ويوجع قلبنا عليه كدة كان نفسي اشوفك ياصحبي اخر مرة شوفتك فيها من سنة قبل ماسافر دبي اللهم رده الي اهله سالم غانم اللهم اخرجه من ظلمات البحر كما اخرجت يونس من بطن الحوت اللهم صبر اهله. وجعت قلبنا عليك يا صاحبي.. سامح غرق لانه كان علي مركب متهالكه بها العديد من الاخرام والفتحات وغير صالحه للابحار مالكها واحد ميعرفش ربنا ميعرفش غير الفلوس..."
وبحزن شديد قالت رندا عويس " ملوش غير اخت ووالدته يتيم الأب يقوم مامته تتعب وتشقي طول عمرها عشان توديه الحاجه اللي بيحبها وهيي الاكاديميه البحريه في الاردن عشان يرجع قبطان اد الدنيا في تجيلها مكالمه ان ابنها مفقود من يوم الجمعه في المحيط الهندي، يارب لو لسه عايش علي وش الدنيا تنجيه "فَاسْتَجَبْنَا لَهُ وَنَجَّيْنَاهُ مِنَ الْغَمِّ ۚ وَكَذَٰلِكَ نُنجِي الْمُؤْمِنِينَ."
