حلمي بكر عن هجومه على حميد الشاعري: ورحمة أبويا وأمي محصل
كشف الموسيقار حلمي بكر، أنه من منح حميد الشاعري، كارنيه لممارسة مهنة الغناء، موضحًا: "أنا اللي أديت كارنيه نقابة المهن الموسيقية لحميد الشاعري، وأنا اللي امتحنته، ومعنى إن أنا أمتحنه فهذا يعني أنه لا يوجد أحد وصل لمستوى ثقافتي، والعبرة ليست بالكلام".
وقال في مداخلة هاتفية لبرنامج "آخر النهار"، تقديم الإعلامي تامر أمين المذاع على فضائية "النهار": "حميد الشاعري مطرب موهوب، وقدم نماذج من الغناء تحمل ملامح، وأنا اللي رشحته لتوزيع لحن الحلم العربي".
وأضاف: "هذا ما ذكرته عن حميد الشاعري، ولم أكن أعلم أن له ابن يعمل موزعًا، والجملة الجديدة اللي عايز يتشهر يسب حلمي بكر"، ورد على نجل حميد الشاعري في تصريحاته التي قال فيها إن حلمي بكر في حاجة لمساعدة والدي، مؤكدًا "بكر": "أبوك هو اللي عايز حد يساعده في تربيته، وهذا آخر ما أقول".
وعن هجومه للمطرب حميد الشاعري، أقسم "بكر"، قائلًا: "والله ما حصل وأنا صادق والله لم أهاجم حميد الشاعري، وما يقوله ابن حميد الشاعري محاولة للشو الإعلامي وهذا ما حدث مع اثنين مطربين قبل ذلك عندما سبوني، وبعدها اختفوا".
وأوضح: "أول مرة أعرف إن ابن حميد الشاعري موزع، وما سلكه سكة رخيصة، وابن حميد الشاعري محتاج للتربية، ورحمة أبويا وأمي لم أهاجم حميد الشاعري".
نديم حميد الشاعري
وكان نديم، نجل الفنان حميد الشاعر، هاجم الملحن حلمي بكر، بعد هجومه على والده خلال ظهوره بالبرامج التلفزيونية.
وقال «نديم» عبر «فيسبوك»: «أستاذ حلمي لو محتاج مساعدة الكابو مش حيتأخر عليك، لكن ما ينفعش كل ما تتزنق تروح برنامج تجيب سيرة حميد الشاعري اللي للأسف تاريخك ميجيش تمن تاريخه ولا فنيًّا ولا أخلاقيًّا للأسف، ٣٠ سنة من عمري ما بيعملش حاجة في حياته غير التقليل من الناس ومن الفنانين ومن أعمالهم».
وأضاف: «اوعَ حضرتك تفتكر إنك محطوط في خانة الإنسان المحنك، لا للأسف، فرق كبير أوى بينك وبين الكابو حتى في الفكر الموسيقى والمعاملة مع الناس. الكابو كبير مقامة ومش بيرد عليك عشان هو أكبر من كدة وأكبر منك بالذات، ودايما يقول لي ما تردش على حد. لكن ولاده كبروا ومش حيسمحوا إنك تقطع في أبوهم».
وتابع: «هو حضرتك بجد فاكر أن حميد هو اللي بوظ المزيكا في مصر؟ المقسوم إلى حضرتك بتتكلم عليه هو اللي واكل بقاله ٣٠ سنة مع كل الفنانين، وهو سر الاستمرارية والنجاح، مفيش البوم بينزل غير ومقسوم الكابو رانن في الودن».
واستطرد: «لما مذيع صابغ شعره أبيض وفي اللفة يسألك سؤال زي ده، المفروض ردك يبقى تربوي قبل الفنى إنه إزاي يسأل السؤال بالطريقة دي، لكن حضرتك كنت حتطير من الفرحة عشان السؤال في تقليل للكابو».
واختتم: «حاول يا أستاذ حلمي تكسب الناس عشان الدنيا فانية. متبقاش خسران السيرة الطيبة وكمان الناس».
