ميدو يعتذر للأطباء.. وعضو مجلس النقابة: "هيجى يوم مش هنلاقى طبيب في مصر"
قال الدكتور أحمد حسين عضو مجلس نقابة الأطباء: "لسنا في معركة مع أحمد حسام ميدو أو أي شخص ونتعامل مع المرضى بدون أي اعتبارات".
سب وقذف ميدو
وأكد خلال مداخلة هاتفية ببرنامج"الحكاية" الذي يقدمه الإعلامي عمرو أديب بقناة "إم بي سي مصر": "توجهنا إلى جهات التحقيق بعد السب والقذف الذي تعرض له الأطباء من ميدو لأنه قال إن القطاع بايظ والأطباء معندهمش ضمير وكلامه غير صحيح لا سيما وأن الجميع أشاد بتجربة مصر في مواجهة كورونا".
مستشفيات القطاع الخاص
وأضاف: "ميدو تحدث عن ازمته مع المستشفيات الخاصة وهي تقدم الخدمة بمقابل مادي، ازاي بقى المستشفيات دي ميبقاش فيها أطباء وهي فاتحة علشان تكسب فلوس، المشكلة انه قام بالسب والقذف لجموع أطباء مصر وقال إن هما معندهمش ضمير، وهذا لم نسكت عليه".
بلاغ ضد ميدو
وتابع: "قدمنا بلاغا ضد ميدو بتهمة السب والقذف ضد الأطباء، والمستشفى مش ملزمة توفر دكتور بعينه للحالة ولكن توفر الطبيب الذي يرعى الحالة صحيا وفق تخصصه".
هجرة الأطباء
ولفت: "بهذه التصرفات التي يفعلها ميدو وغيره ضد الأطباء هييجي يوم ومش هنلاقى طبيب في مصر، عندنا لاعب الكرة في مصر راتبه الشهري أكثر من 300 مرة من راتب الطبيب".
وأكمل:"مفيش لاعب في العالم يطلع يقول مفيش أطباء عندها ضمير".
رد ميدو
ومن جانبه قال أحمد حسام ميدو لاعب نادي الزمالك السابق: "أنا الإعلامي الرياضي الوحيد والمشهور الوحيد اللى في سنة 2018 اللى طالب بتحسين ظروف أطبائنا وزيادة أجورهم بما يتناسب بالمجهود العظيم اللى بيقوموا بيه، وذكرت ان زوج اختي طبيب مخ واعصاب ويتقاضى راتب شهري 9 آلاف جنيه".
مشكلة ميدو مع الأطباء
وأضاف: "قلت في الفيديو اني كنت في الساحل وحمايا تعبان وهو مريض سرطان وحالته بتتدهور فقلت لهم روحوا مستشفى دار الفؤاد بمدينة نصر لان زوج أختي بيتشغل في المستشفى، ولكن الناس في المستشفى حطوا الحالة على جنب والراجل بيموت وفضل نصف ساعة محدش عاملة حاجة وركنوه بحجة الخوف من إصابته بكورونا ورفضوا الحالة، وفيه واحد صاحبى قاللى فيه مكان في مستشفى العقاد والناس استقبلوا والأطباء الصغيرين قاموا بكل اللى قدروا عليه وكلموا الاستشاريين في التليفون وبناءً علي توجيهات الاستشاريين الكبار حمايا اتحسن وهو موجود حاليا في العناية المركزة".
اعتذار ميدو
وتابع: "أعتذر لكل طبيب مسه الكلام اللى أنا قلته ومكنش ينفع التعميم واقول الأطباء معندهمش ضمير، وفوجئت ان نقابة الاطباء عاملة بلاغ للنائب العام اني بحرض على الأطباء والفيديو بتاعي فيه سب وقذف للأطباء وهذا لم يحدث علي الإطلاق، وأنا في الفيديو كنت بحارب علشانهم، وبدل ما تحاربني حط ايدك في ايديا علشان نحسن أحوال الأطباء بدل ما تحاربني".
لحظة غضب ميدو
ولفت: "فيه كلام انا قلته في لحظة غضب ولكن اللى بيحصل في المستشفيات ان الدكاترة الصغيرين بيخافوا يكلموا الاستشاريين الكبار في وقت الأعياد، وعشت في انجلترا 8 سنين ولا يمكن ابني اخده المستشفى حتى في وقت الكريسماس وملقيش مفيش دكاترة كبار".
شكاوي ضد القطاع الصحي
وأكمل: "كم الرسائل اللى جاتلي والناس اللى عايزة تشتكي القطاع الطبي وشكاوي وفيات بسبب تدهور الحالة الصحية لعدد كبير من المرضى كبير جدا".
خلل المنظومة الصحية
ومن جانبه رد الدكتور أحمد حسين عضو مجلس نقابة الأطباء: "المنظومة الصحية فيها خلل في مصر، وطبق النظام اللى في انجلترا عندنا وهتشوف الوضع الصحي عامل ازاي، انا لم أحقر من أي حد، وانت اهنت معظم أطباء مصر واحنا علي رأسنا قامات ولا يصح أن يهان معظم اطبائنا ومينفعش احط اسم علي صفحة النقابة وهو يهين الأطباء، يا كابتن ميدو شوف مين المسئول عن انهيار المنظومة الصحية من وزير الصحة ورئيس الوزراء ورئيس الجمهورية واشتكي في الصح مش تقول الاطباء معندهمش ضمير".
رسالة ميدو للمسئولين
وعلق ميدو: "أنا مش بخاف وقادر أروح معاك في أي مكان، وحدد ميعاد واروج حتي مكتب رئاسة الوزراء، ورسالتي وصلت للمسئولين وبقول لنقابة الأطباء حطوا ايديكم في ايديا ونشوف ايه سبب أزمة المنظومة الصحية".
مشكلة الخدمة الصحية
وعقب الدكتور حسين:"مش حقيقي ان معظم اطباء مصر معندهمش ضمير لو كده نقفل المستشفيات وهاتوا كابتن ميدو واللى بيفهم في الطب ويشغلوها، انما الحكاية اننا عندنا مشكلة في الخدمة الصحية".
والدة ميدو
ولفت "ميدو": "أنا أمي جالها كورونا وقعدت في مستشفى دار الفؤاد أسبوعين كاملين وكانوا الأطباء على أعلى مستوى".
رسالة سيئة لأحد الأطباء
وتابع"ميدو": "أقسم بالله أحد الأطباء قال احنا منشيلش قرف حد، وبعض المستشفيات ترفض استقبال بعض الحالات من المرضى".
الطب الدفاعي
وعلق "حسين": "نتيجة الاعتداء على الأطباء بقى فيه ما يسمى بالطب الدفاعي من خلال رفض بعض الحالات الخطرة خوفا من تدهورها ووفاتها ومن ثم ينتج عنها ضرب الطبيب والاعتداء عليه واتهامه باطلا بتسببه في وفاة الحالة".
