بعد واقعة أحمد يحيى.. عمرو أديب يطالب بهذه العقوبة على الاتحاد السكندري | فيديو
أعرب الإعلامي عمرو أديب، عن غضبه واستيائه الشديد لما حدث من بعض جماهير الاتحاد السكندري تجاه حارس المرمى أحمد يحيى في مباراة سيراميكا كليوباترا.
موقف سيئ لجمهور الاتحاد السكندري
وقال عمرو أديب خلال برنامج "الحكاية" المذاع على قناة "إم بي سي مصر": "عملة سودة عملها بعض جماهير الاتحاد السكندري وهاجموا حارسهم أحمد يحيى اللى أخوه تُوفى قبل الماتش ولعب".
موقف غير أخلاقى
وأضاف: "ما حدث مع الحارس أحمد يحيى أقل ما يتقال عليه أنه توحش ولا إنساني وغير أخلاقي وغير رياضي، وشيء منحط".
وتابع: "الحارس بعد وفاة أخوه لبَّى نداء النادي ونزل يلعب دخل فيه 5 أجوال غير مسئول عنهم وده بيحصل لأي حارس مرمى سواء لنادي ليفربول أو برشلونة، وابتدت الناس تشتمه شتيمة قبيحة غير طبيعية وهو الولد مش ناقص والجمهور عارف أنه بيلعب وأخوه ميت فالشاب ساب الجون وقالك والله ما ألعب كورة تاني وأنا معاه، إيه ده هو ده الهدف بتاع الكورة، جرى إيه يعني هو إنتوا كنتوا بتنافسوا على الكأس مثلًا أي نادي معرَّض يخسر وأي حارس معرَّض لكده".
عقاب الاتحاد السكندري
وأكمل: "الراجل وهو خارج بيعيط وبيقول مش لاعبها تاني كملوا شتيمة فيه وفي عائلته وأخوه، هو إيه اللى بيجرى ده، لازم عقاب للجمهور ده قاسي، والنادي ده لازم يتعرض لعقوبة قاسية، إزاي نسمح بالمهزلة دي، وإحنا إزاي وصلنا لمرحلة زي دي".
اعتزال أحمد يحيى
وأضاف: "الحياة أهم من الكورة.. فيه ربنا والأخلاق والرحمة، الكورة دي هايفة جدا، أنا لو من أحمد يحيى والله ملعبهاش تاني ولا ألعب مع النادي ده تاني، عايزين إجراء حازم ضد الجمهور ده".
وأعلن أحمد يحيى، حارس مرمى الاتحاد السكندري، اعتزال كرة القدم نهائيًّا بعد أحداث مباراة الاتحاد السكندري وسيراميكا كليوباترا.
وكتب أحمد يحيى عبر صفحته على موقع التواصل الاجتماعي "فيس بوك": "شكرًا جمهور مصر على الدعم والمساندة، شكر الله سعيكم جميعًا.. ولا يريكم الله مكروهًا أو سوءًا في عزيز لديكم.. يا رب".
اعتزال كرة القدم
وأضاف: "بعد أحداث الأمس قررت اعتزال كرة القدم نهائيًّا.. وإنا لله وإنا إليه راجعون.. وعند الله تجتمع الخصوم".
