مصطفى الرومانتي يكتب: مات العظيم عاطف فاروق

مات النبيل.. مات الخلوق 
مات العظيم.. "عاطف فاروق"

كان أب لينا وقدوة لينا 
ومحتوينا وكان خدوم
وانا مافتكرش في أي ضيقة
عمره ماتأخر في يوم.

مات اللي كان عايش أسد 
لأجل إنه يقضي على الفساد
كان سيف حقوق، كان قلمه فوق 
"صوت أقوي من صوت الزناد".

عاش الحياه دايمًا خفيف
قلبه الكبير دايمًا نضيف
ولا مد ايده لــ رشوه يوم
كان مدرك انه فــ دنيا زيف.

في المحنة تلقي معاه حلول
كان حد فاهم في الأصول 
وانا مهما هحكي كتير واقول
يعجز كلامي في حضرته.

كان ساند الدنيا بإيديه
كان شايل الكل في عينيه
والكل كان مسنود عليه
وبيعشقوا تراب جزمته.

كان طوق نجاه لقلوب كتير 
كان حد صاحي فيه الضمير
كان قلبه كله صفاء وخير
بركان طيابة وجدعنة.

سيرة وحكاوي ماتنتهيش
وكلامه لينا مايتنسيش
يسعي ويعمل خير كتير
ولا عمره ييجي يقول أنا..

مات النبيل مات الخلوق 
مات الشريف "عاطف فاروق"

إهداء من ابنك مصطفى، ربنا يرحمك ويغفرلك ويسكنك الفردوس الأعلى من الچنة.