مناخوليا.. إدينى الحقنة بسرعة
كلما حاولت الخروج من هذه المناخوليا أجدهم يجرجرونى للداخل مرة أخرى ويعيدوننى إلى عنبر العقلاء مباشرة.. فآخر ما أعادونى به هو تلك التحذيرات التى انتشرت على السوشيال ميديا من الحقنة التى يتصيدون بها الفتيات فى المواصلات العامة.. يعنى شكة واحدة بالحقنة أو الدبوس كما يسميه البعض كفيلة بأن تدخلك فى غيبوبة لمدة 24 ساعة وتصبح فريسة لتجار الأعضاء البشرية يمزقون جسدك إربا إربا ويبيعونك بالقطعة فى سوق الأعضاء اللى بيتنصب كل يوم خميس بكفر الملاحيس مركز الهلاوس البحرية بمحافظة المهلبية.
شكة واحدة كفيلة بأن تُدخل الفتاة فى غيبوبة قد تتعرض خلالها للإغتصاب أو أشياء أخرى الله أعلم بها تدخل تحت بند نشر حالة من الرعب والفزغ داخل المجتمع الملسوع بحرارة الشمس ورطوبة الجو والمخنوق من زيادة الأسعار والمدروخ من فيديوهات التيك توك والمرووش بفعل ترندات السوشيال ميديا.
يا ناس احنا فينا اللى مكفينا ولا نستحق أن نشغل أنفسنا بحقنة أو دبوس من صناعة الوهم والخيال.. طب الناس بقت بتخاف من بعضها داخل المواصلات لدرجة إنك لو حطيت إيدك فى جيبك ممكن تلاقى اللى جمبك بيتفزع خصوصا لو كانت بنت.
بالله بلاش ترعبوا بناتنا وأولادنا لدرجة انكم عاوزين تخلوا أولياء الأمور يعلقوا "آى دى" على صدر الأطفال والشباب.. أم الستات فلا تشغلوا بالكم بهن.. فهن يركبن المواصلات ولسان حالهن يقول: "إدينى الحقنه بسرعه.. أرجوك محتاجه الجرعه".. وعجبى!
