"حطو جثتها في تلاجة بايظة".. حكاية وفاة رضيعة داخل حضانة مستشفى بالمهندسين
اتهمت أسرة رضيعة أحد المستشفيات الخاصة بالإهمال والتسبب في وفاتها بسبب الإهمال الطبي، وسردت أسرة الرضيعة القصة على موقع التواصل الإجتماعي فيسبوك.
طفلة الحضانة
وكتب محمد طه والد "طفلة الحضانة" المتوفاة، على صفحته الشخصية بموقع التواصل الاجتماعي فيسبوك: "بعد شهر في الحضّانة تبقي هي دي آخرتها.. بعد أكثر من ١٥٠ ألف جنيه دفعناها للمستشفى تبقى هي دي آخرتها".
وأضاف والد "طفلة الحضانة": "أكتر من ٦ ساعات في المستشفى ومفيش حد أكلمه ومدير المستشفى مش راضي ييجي.. أنا عملت محضر إهمال طبي حمل رقم 4757 لسنة 2022 إداري العجوزة بس للأسف تنازلت عنه عشان أقدر أدفن بنتي عشان ما يحصلش تشريح.. والنيابة طلعت قرارها بعمل كشف عن طريق مفتش الصحة والتي أفادت بعدم وجود شبهة جنائية ولكن أكدت أن اللي حصل دا غير آدمي".
وتابع: "لكن تتخيلوا أن دكتور الحضَّانة في أقل من ساعة ينزل البنت في المكان دا مع العلم أن تكلفة إقامة اليوم مدفوعة مسبقًا.. أنا هقدم شكوى في المستشفى لإدارة العلاج الحر ومش هسكت غير لما أرجع حق بنتي".
وكتبت آية مصطفى خالة الرضيعة على صفحتها الشخصية بموقع التواصل الاجتماعي "فيسبوك": أختي دخلت تولد يوم 29/5/2022 في المستشفى والبنت دخلت الحضانة عشان الرئة ما كنتش مكتملة وكانت على جهاز تنفس صناعي".
وأضافت: "بعد كام يوم قالوا لنا إنها جالها التهاب رئوي (عدوى من إحدى الممرضات) وأنكروا أنها اتعدت منهم وان حد فيهم عيان ومن بعدها وحالتها تدهورت جدًّا وابتدت تنزف وابتدوا يعملوا لها عمليات للكلونات المركزية بدون علمنا (كنا بنعرف لما بنسأل لما يروحوا المستشفي)".
وتابعت: "كانوا مانعين أي حد يشوفها حتى مامتها وباباها شافوها من ورا الزجاج من بعيد ممنوع حد حتى يشوفها وسكتنا ورضينا على أمل أنها تخف".
واستطردت: "الدكتورة اللي متابعة حالتها كل ما يطلبوا التقرير عشان يعرضوه على دكتور تاني مترضاش تديهم التقرير بالحالة وفضلت على الحال دا شهر وهي حالتها بتسوء كل يوم اكتر والوضع دا استمر لمدة ٣١ يوم لحد يوم 28/6/2022 اتصلو الساعه ٨ الصبح وقالوا توفاها الله ورحمها من العذاب اللي كانت فيه".
وتابعت: "روحنا ناخدها في اقل من ساعة.. فوجئنا انها مش موجوده في الحضانة.. ندور على البنت مفيش حد يقولنا هي فين لحد ما شوفنا المهزلة.. واكتشفنا أن البنت في مكان لا يصلح لأي شيء موجود فيه المطبخ والغرف الخاصه بالنظافه للمستشفى وتجميع النفايات.. مكان في منتهى الاهمال
فوجئنا انهم حاطين البنت في رف تلاجة ميني بار بايظه".
