غراب البين يكتب: قولوا للستات يرحموا رجالتهم

بعد يوم طويل من اللف والدوران والمرازية فى خلق الله وبينما أقف على "التنده" التى تظلل بلكونة الحاج عبد التواب وإذا بى أسمع حوارا دائرا بينه وبين زوجته أم أيمن
 

الست أم أيمن تعبانة من حرارة الجو وتقول للحاج عبد التواب شوفلك حل يا حاج فى الجو ده.. فقال لها بكل هدوء: حاضر.. هكلم بتوع الأرصاد ينزلوا درجة الحرارة من الاسبوع الجاى إن شاء الله

الرد لم يعجبها وواضح إنهم هارشين بعض فقالت له: العيال عايزين يروحو مصيف وواكلين دماغى.. إيه رايك تحجزلنا اسبوع فى أى مصيف وتريحنا من دوشتهم

فقال لها: إطلعى انتى من دماغى علشان أنا مش ناقصك.. ادخلى اتفرجى على برنامج الحكاية هتلاقى عمرو أديب بيقولك وفرى فى المصاريف علشان أحنا داخلين على أيام سودة
 

طبعا أم أيمن لم يعجبها الرد فخرجت عن هدوئها وصرخت فى وجه الرجل وأخذت تهزى بالكلام وتذكره بأنه لم يذهب بهم للمصيف منذ ثلاث سنوات مرة بحجة الكورونا ومرة بحجة التقشف ومش عارفين إمتى هنصيف زى خلق الله الأمر الذى جعل الحاج عبد التواب يقول لها: طب انا سايبلك البيت خالص ونازل القهوة علشان تنزلى من فوق دماغى
 

وهنا نفشت ريشى وأخذت أنعق بأعلى صوتى "قاق قاق" فراحت أم أيمن تهشنى وتقول لى غور من هنا يا غراب البين جبتلنا النكد والفقر.. فرفرفت بأجنحتى هاربا ولسان حالى يقول: بقا أنا اللى جبتلكم النكد والفقر أم أنكم من تنكدون على أنفسكم لأتفه الأسباب.. إيه الستات دى اللى بتطلب مصايف فى شهر كله مصاريف.. يعنى العيد مصاريف ولحوم العيد مصاريف والمدارس مصاريف وملايس العيد والمدارس مصاريف.. والمأكل والمشرب والفواتير مصاريف..ورغم كل ده انتى لسه برضو عايزه تروحى "مصاييف"؟!.. ياخى جاتها ستين ألف نيلة اللى عايزه تخلف بنى آدمين ستاتهم مش بيرحموا رجالتهم!