بعد "خناقة" الموسيقيين.. أحمد رمضان: "ماينفعش نظهر بالشكل ده"
أعرب أحمد رمضان سكرتير نقابة المهن الموسيقية عن استيائه عما بدر في مؤتمر حسن شاكوش والعازف الشهير سعيد الارتيست، الذي عقد اليوم الإثنين بأحد الفنادق الكبرى.
وقال "رمضان": "اللي حصل مش صح وماينفعش نظهر للعالم بالشكل ده، يا جماعة متعملوش كده يعني"
وأضاف: "الأستاذ حلمي عبد الباقي هو مسؤول عن كلامه لكن هو وقع وهو يعلم جيدا بالتظلم وهو موافق علي عودة حسن شاكوش ومفيش مؤتمر هيتعمل تاني "خلاص خلصت" وحصل اللي حصل وعدي الموضوع وأستاذ هاني مستاء من اللي حصل طبعا".
و تابع "رمضان": "سعيد الارتيست كلم الفنان هاني والأستاذ هاني اتكلم معاه والمفروض الراجل ده خد الكارنيه بعد ما اعتذر وهو قال ما هو اعتذر مرة واتنين وتلاته والمجلس خلاص خد قرار".
ونشبت مشادة كلامية بين العازف سعيد أرتيست وأعضاء نقابة المهن الموسيقية ومع سكرتير نقابة المهن الموسيقية أحمد رمضان، ووصلت لحد التدافع بينهما بسبب رفض اعتذار حسن شاكوش بسبب حصوله على الكارنيه قبل عقد المؤتمر الصحفي.
وقام حسن شاكوش وسعيد أرتيست وجميع الحاضرين بمغادرة المؤتمر بعد فشل محاولة الصلح.
وكان الفنان هاني شاكر قال إن مطرب المهرجانات حسن شاكوش تم إيقافه بعد المشكلة التي أثارها على المسرح وكان فيه خروج عن النص.
وتابع خلال لقائه ببرنامج "مصر جديدة" المذاع على قناة "إي تي سي": "أتمنى أن حسن شاكوش ما يعملش مشاكل تاني وتبقى آخر مشكلة في حياته ومسيرته الفنية".
وقال: "لو حسن شاكوش غلط تاني هيتعاقب، ولكن هو الفترة اللي فاتت قدم أكثر من مرة اعتذارا لنقابة الموسيقيين وطلع عمل فيديوهات واعتذر لزملائه عازفي الإيقاع على الكلام اللي قاله وقت مشكلته على المسرح، وعفا الله عما سلف، وما حدش بيتعاقب طول العمر، وهو أتوقف حوالي 9 شهور".
