محمود التهامي يهاجم هاني شاكر: هاخد حقي وبالقانون | فيديو
قال محمود التهامي، نقيب المنشدين: أنا هتكلم في حاجة مهمة. ودي أول مرة أتكلم في التفاصيل وهي أزمة نقابة المهن الموسيقية.
وأضاف في منشور عبر صفحته الرسمية، لنقابة المهن الموسيقية ادعت عليه زورًا وباطلًا إني كنت في حفل في محافظة أسوان وأنا ما كنتش في أسوان في هذا التوقيت وأثبت أني ما كنتش في أسوان في هذا التوقيت وكلمنا نقابة المهن الموسيقية إن اللي بيحصل ده لا يليق بالنقابة ولا بينا واحنا كبار وما ينفعش بعض الموظفين يزوروا باطل ويدعو ضدنا هذا الأمر.
وأضاف: "كان المفروض نقيب الموسيقيين ياخد إجراء جاد يليق بينا وبه وبتاريخ النقابة وأنا قعدت سنة بالأدب وبالذوق أناشد، يا جماعة أنا ما كنتش في محافظة أسوان في هذا التوقيت، وده تزوير من نقابة المهن الموسيقية في حقي وإجرام علشان خاطر خلافات خاصة بأمور تانية (مناقشة قانون نقابة المنشدين بمجلس النواب) كان نفسي نقيب الموسيقيين يدخل ويوقف المهزلة اللي حاصلة دي من موظفي النقابة.
ويكبر ويعرف قيمتنا وقيمه المنشدين والفنانين ولكن للأسف لم يفرد لنا الوقت اللي أفرده للمهرجانات وكل شويه النقيب هاني شاكر طالع لنا مع حمو بيكا وحسن شاكوش وعمر كمال ياعم احنا منشدين والله والبلد بتتشرف بينا. ولينا تاريخ ولينا أصول والعالم بيتشرف بينا معلش يعني خد من وقتك شويه وحقق، شوف الموظف المزور اللي أدعي علينا باطلا هو عاوز ايه".
وأكد التهامي أن نقابه المهن الموسيقيه خالفت اللائحة، لما يبقا عضو عامل عنده مشكله يعمل ايه.، يبعتله إنظار واحد، يبعتله إنظار اتنين، وبعد كده يحوله للتحقيق.. لا تم إيقاف محمود التهامي لمشكله في أسوان بدون تحقيق ولما طلبنا من النقابه أنهم يبعتو يجيبو الناس بتوع اسوان علي حسابي الشخصي حصل نوع من التعنت.
وتابع: “يا جماعه عيب إحنا كبار، وابتدأ الإعلام طبعا يتكلم في هذا الامر وتصدرت مواقع البحث إيقاف محمود التهامي، بقيت لما اسافر بره والناس بتكرمني في العالم بره بيكلموني إزاي نقابه المهن الموسيقيه بمصر توقف منشد زي حضرتك ومعلم وقدوه. …. يا عم هاني شاكر إنتا فين من المهزله بتاعت موظفينك ؟ لما انتا مش فاضي للمنشدين ولا للانشاد اومال فاضي لايه. للمهرجانات هيا مصر بقت بلد المهرجانات؟”
وأردف: “تسيب الموظفين إللي عندك في النقابه تدعي علينا باطل وزور بما لايليق بتاريخنا ؟ وبناء عليه، أنا طبعا مكمل في هذا الإجراء القانوني، وهاخد حقي بالقانون لاني إللي مايعرفهوش سياده النقيب واللي ميعرفهوش موظفين نقابه المهن الموسيقيه ان مصر بلد الانشاد.. مصر ورئيس مصر بيدعمو كل ما هو هادف اللي مايعرفهوش رئيس مصر زي ما بيبني في المباني، بيبني في المعاني”.
واختتم حديثه: “هوصلهم رساله مصر بلد الإنشاد ولينا كرامتنا ولينا وضعنا وحقنا هانعرف تاخده بالقانون والله قوي جبار، لا يرضي بغير الفجار وسلاح الباطل من ورق والحق سلاح من نار”.
