انسى الفلوس وهقولك تعيش إزاي.. مجدي يعقوب يوجه نصائح ذهبية لأطباء مصر |فيديو
قال جراح القلب العالمي الدكتور مجدي يعقوب: "هناك كفاءات رائعة في مصر من الشباب لكن لا بد من أن يؤمنوا بما يفعلونه لخدمة المجتمع وليس لتحقيق نجاحات شخصية فقط".
قمة النجاح
وأضاف خلال لقائه ببرنامج "مساء دي إم سي" الذي يقدمه الإعلامي رامي رضوان بقناة "دي إم سي": قمة النجاح يكمن في السعادة التي نشعر بها عند خدمة المجتمع وعمل الخير.
رسالة مجدي يعقوب للأطباء
وتابع: "بقول للأطباء إحنا خدامين المجتمع، وخدامين المريض والعلم والمعرفة، والباقى انساه، هتقول وأنا هعيش إزاي؟ هقولك هتعيش عيشة جميلة جدا وهتبقى سعيد لما تشوف مريض جايلك بعد 35 سنة وكان بيموت وهو صحته كويسة وسعيد جدا".
خدمة المجتمع
ولفت: "إذا مكنتش خدام كويس لشغلك العيش هيجيلك إزاي، لازم محب ومؤمن باللى بيقدمه وهتلاقى ربنا بيكرمك كرم كبير".
وكشف الدكتور مجدي يعقوب جراح القلب العالمي، في حوار سابق، أن تكلفة إنشاء المركز الجديد للقلب بـ6 أكتوبر بجوار مدينة زويل تصل إلى بليون جنيه مصري.
مركز 6 أكتوبر للقلب
وأضاف خلال لقائه الخاص بالتليفزيون المصري: أن مركز أسوان للقلب سيظل هو الأم بنفس أفكاره والمبادئ التي وضعت فيه كما هي لن تتغير، وسيكون مركز 6 أكتوبر امتداد له في كل شيء.
قصة جمال عبد الناصر
وعن دعمه لقضية المساواة في الحصول على الخدمة الصحية في مركز أسوان للقلب، أوضح: أتذكر أيام الرئيس الراحل جمال عبد الناصر بكل حب فلقد كان هائلًا، خاصة في جملته الشهيرة بأنه قد مضى عهد الاستعباد، وقتها كنت أدرس الطب بكلية قصر العيني في الخمسينيات.
وكانت أيام جميلة وكان يؤكد الزعيم الراحل على أن تعليم الطب حق لكل إنسان، وهذا جعلني أعمل ليلًا ونهارًا، وكان هناك أطباء روس يدرسون في كلية الطب قصر العيني، وكانوا يعلموننا جيدا، وكنا نذهب للريف لعلاج الناس البسيطة، وده كان بالنسبة لنا درس إنساني".
تجربة عبد الناصر الملهمة
وتابع: "أحترم الرئيس الراحل جمال عبد الناصر وكان دايما يقول لنا الحكومة ستفعل كل شيء تستطيع أن تقوم به ولكن نحن كمواطنين نفعل أيضا، وأعتبر نفسي خدام للمجتمع والناس الغلابة ومفيش تفرقة بين الناس لأن المرض واحد والعلاج واحد ومهمتنا نخفف آلام الناس".
وكشف الدكتور مجدي يعقوب، جراح القلب العالمي، في الجزء الأول من نفس اللقاء: "في أوروبا مستغربين مننا وبيقولوا إزاي بتعملوا عمليات بأحدث الأجهزة وبـ10/1 الثمن".
اندهاش الأوروبيين
وتابع خلال لقائه الخاص بالتليفزيون المصري: "الأوروبيين بيقولوا إزاي بتعملوا جهاز صناعي وآخر عمليات الأطفال مش بنصف الثمن لأ بـ 1/10 الثمن".
تبرعات مركز القلب بأسوان
وأضاف: "التبرعات اللي بتجيلنا عارفين انها جايلنا من ناس متوسطي الدخل ومحدودي الدخل وده أمر نبيل ومسئولية علينا، وبالتبرعات دي بنروح نشتري بيها أحدث الأجهزة في العالم".
تكلفة عملية القلب للطفل
وأشار: "عملية القلب للطفل في مركز أسوان للقلب اللي بتتكلف في أوروبا 200 ألف دولار بنعملها بـ 9 دولارات، ولما بكلم الأوروبيين والأمريكيين بيستغربوا ويقولوا إزاي يكون جودة العمليات أحسن وبـ 1/10 الثمن".
أجر أطباء مركز أسوان للقلب
وتابع الدكتور مجدي يعقوب: "جزء مننا في الفرق الطبية مبياخدش ولا مليم، والاطباء اللي عندنا أحسن من اللي موجودين في أوروبا، وفيه أساتذة من أوروبا وامريكا بيجوا يشتغلوا معانا ببلاش".
موقف إنساني لـ مجدي يعقوب
ولفت: "فكرنا في عمل مركز طبي للقلب يخدم الناس بمساواة كاملة ودي من أهم الأشياء، بعيدًا عن اللون أو الجنس أو الحالة المادية والاجتماعية، وأنا ممثل لفريق كبير جدا ومش بشتغل لوحدي، وكل واحد بيؤمن بالمبادئ وبيتشغل من أجل خدمة المرضى والعلم والاكتشافات الجديدة في المرتبة الثانية، والمريض اهم انسان في المستشفى وكلنا بنخدمه وبنعامله بطريقة إنسانية وبشكل فيه كرامة وبنقول له إزيك يا فندم، ولو كان طفل مش بنعتبر مريض ولكن بنعتبره من العيلة بتاعتنا".
