بسبب "ما تجرحنيش".. القصة الكاملة لأزمة شيرين مع بهاء الدين محمد
أثارت المطربة شيرين عبد الوهاب، حالة من الجدل خلال الساعات الماضية، وذلك بعدما ردت على سؤال أحد متابعيها على موقع الصور "انستجرام" عن أكثر أغنية ندمت على تقديمها، لترد بأنها أغنية "ماتجرحنيش".
أغنية ما تجرحنيش
وأغنية ما تجرحنيش كانت قد صدرت عام 2003 ضمن ألبوم شيرين "جرح تاني"، والأغنية من كلمات الشاعر بهاء الدين محمد، الحان حسن ابو السعود، توزيع مدحت خميس، مهندس صوت أمير محروس.
بهاء الدين محمد يرد
الأمر الذي جعل الشاعر بهاء الدين محمد مؤلف الأغنية يرد على تصريحات شيرين عبر حسابه الشخصي على موقع التواصل الاجتماعي "فيس بوك"، قائلا: "مش متعود أرد على أي حد.. ولكن لما حد يتجاوز حدوده لازم يقف مكانه، ويعرف إنه مهما اتعود يغلط لازم ييجى عند بعض الأسماء ويحاسب ويخلى باله، وخاصة لما حد في كل كارثة يدافع عنها.. وهتكلم باختصار جدا".
وتابع بهاء الدين محمد: "المشهد الأول، أول يوم دخلت شيرين عبد الوهاب مكتبي كانت مع الأستاذ نصر محروس، اللي هو صاحب الفضل في تقديمها، وبعد دقائق من اللقاء لقينا شيرين بتبكي وسألها نصر بتعيطي ليه ردت علشان أنا قاعدة مع الأستاذ بهاء".
رسائل بهاء الدين محمد
وأضاف: "والمشهد الثاني رشحتها تغني كتير بنعشق، ولولا موافقة نصر احتراما للعشرة اللي بنا ماكانتش هتغنيها، لأنها كانت موقوفة من النقابة".
واستكمل: "المشهد الثالث لما فوجئت بمدير أعمالها الراجل اللي أنا بحبه وبحترمه، لقيته بيكلمنى نيابة عنها ويقولي سمعني الجديد، وده طبعا خطأ لأن اللى بيغني مهما كان اسمه مش المفروض يغلط غلطة زي دي، لأن المشهد ده مش لايق على المشهد الأول.. المشهد الرابع والأخير أغنية ماتجرحنيش أنا لحد الآن مش عاجبني غُنا شيرين مع احترامي الكامل لصوتها، وأكيد لولا الأستاذ نصر ماكانش هيتم اللقاء.. وماتجرحنيش من أهم أعمالي ومن حقي أدافع عنها".
واختتم قائلا: "وكمان لأول مرة ألاقي حد بيحارب نَفسه وبيغلط في مبدعين اشتركوا في صناعته.. وعشان أكتب الكلام ده يبقى شيرين غلطانه كالعادة، بس كان لازم أقولها ما تعمليش كده تاني وأنتي بتكبري بس مش هتعدي حدود حجم بعض الأسماء ولا أعمالهم".
