رحمة حسن تتعرض لمهاجمة كلب: عضني في منطقة حساسة
كشفت الفنانة رحمة حسن عن تعرضها لحادث بعد مهاجمة كلب لها، وعضها.
وحكت رحمة حسن عبر حسابها على “إنستجرام” أنها كانت تسير في الشارع بجوار منزلها مساء أمس، حين غافل كلب صاحبته وقفز ليهاجمها ويعضها محدثًا جرحًا عميقًا في جسدها.
وأوضحت: "امبارح الساعة ١١ بليل كنت نازلة أجيب حاجة من السوبر ماركت جمب البيت، كنت ماشية علي الرصيف وكان في عربيه بتركن جمبي عادي، فجاه الباب اتفتح ولقيت كلب جيرمن شيبرد بيهجم عليه بكل قوته".
وتابعت رحمة حسن: "طبعًا حاولت أجري لكن للأسف الكلب كان قوي وشرس ووقعني علي الأرض، حاولت أقوم وأجري وصاحبته حاولت تشده، بس فك الوش بتاعه وعضني عضه كبيرة وغويطة بنابه في منطقة حساسة".
وأضافت: "صاحبة الكلب كتر خيرها أخذتني فورًا على مستشفى إمبابة، ادوني حقنة تطعيم الكلب ولسه فاضل لي ٤ هاخدهم خلال شهر، بس المشكله أن من امبارح الجرح بينزف دم كتير، وأنا طبعا خايفه ومصدومة وتعبانة وعندي تروما من امبارح واللي واجعني أكتر أني مَش عارفه اتصرف إزاي، خصوصًا أني أكيد مَش عايزة الكلب يتأذى، بس كمان مَش عايزة أي إنسان كمان يتأذى ويتعض ويتبهدل في الشارع زيي".
فيما أكدت رحمة حسن أنها اعتادت رؤية صاحبة الكلب وهي تنزهه، وكنت تتجنبه، موضحة: "أنا كنت بشوف الكلب ده دائمًا مع صاحبته بتمشي بيه في الشارع جمب البيت عندي، وعشان شكله شرس كنت بمشي بعيد عنه لما بشوفه، امبارح صاحبة الكلب قالت لي متخافيش هو عض ولادي قبل كدا وتمام محصلش حاجة".
وقالت:"طبعًا أنا اتصدمت لما عرفت أنها مَش أول مرة الكلب يعض حد ومع ذلك هي سايباه عادي في الشارع من غير كمامه أو حد قوي يمسكه، بجد حرام عليكم، الكلب لما بيكون حجمه كبير وشرس بيعتبر سلاح، وصاحبه مسؤول مسؤولية كاملة عنه ويحاسب على إهمال مسؤوليته، خصوصًا لو إهماله تسبب لشخص تاني في أذى بدني يحتاج أكتر من ٢١ يوم علاج وأذى نفسي ماعرفش هيحتاج قد إيه عشان يخف".
وأشارت رحمة حسن إلى إصابتها بالخوف الشديد من الحيوانات الأليفة، قائلة: "أنا كنت بحب أنزل أحط أكل ومياه للكلاب والقطط تحت البيت، دلوقت أنا حقيقي مرعوبة أقرب منهم وخايفة جدًّا".
واختتمت قائلة: "أنا آسفة طولت عليكم بس أنا بجد مَش عارفه المفروض أعمل إيه عشان محدش تاني يتأذى".
يذكر أن رحمة حسن شاركت مؤخرًا في مسلسل "ملف سري" الذي تم عرضه خلال شهر رمضان الماضي، وهو من تأليف محمود حجاج، إخراج حسن البلاسي، وبطولة هاني سلامة، عائشة بن أحمد، نضال الشافعي، ماجد المصري، إدوارد، محسن محي الدين، محمد محمود عبد العزيز، دينا، دنيا عبد العزيز، مادلين طبر، كارولين عزمي وصبا الرافعي.
