مصر خدت شبابه كله.. تعليق صادم من عمرو أديب على تجنيس إنجلترا للشوربجي
علق الإعلامي عمرو أديب، على إعلان الاتحاد الإنجليزي للإسكواش، تجنيس اللاعب المصري محمد الشوربجي، ليخوض البطولات الدولية المقبلة تحت راية العلم الإنجليزي.
تربية وحياة محمد الشوربجي
وقال عمرو أديب خلال برنامج “الحكاية” المذاع على قناة “إم بي سي مصر”: "أنا مش شايف الراجل عمل حاجة غلط خالص، الراجل قضى نصف حياته في إنجلترا، وكنا بنستدعيه فقط يلعب باسم مصر، إنما الراجل تربيته وأكله وشربه وتدريبه في إنجلترا، والراجل دفع الثمن لمصر بطولات وبطل عالم، قالبين على الراجل الدنيا ليه خلاص ربنا معاه".
هجرة الكوادر المصرية
وتابع: "ما حدش في مصر عمل له حاجة ولم يقدم له شيء يذكر علشان نقول أكلتك وشربتك، والراجل بعد سنين بالتالي حصل على الجنسية الإنجليزية، واحنا كل يوم عندنا دكاترة ومهندسين وخبراء بياخدوا الجنسية ولا حد بيقول لهم حاجة اشمعنا الشوربجي اللي قالبين عليه الدنيا".
تصنيف مصر في الإسكواش
وتساءل: "ماذا قدم اتحاد الاسكواش لـ محمد الشوربجي؟ قالبين على الراجل ليه ربنا معاه وما حدش عمل له حاجة، واحنا مش هنلعب حد غصب عنه، وبعدين دي لعبة فردية، متشكرين ومصر ولادة وعندنا 6 في العشرة الأوائل، هو دفع الدين اللي في رقبته بطولات عالم، إنما لو هنتكلم في الحق مصر لم تقدم له مثلما قدم الإنجليز".
حالة التشنج ضد محمد الشوربجي
وأكمل: "بلاش الحالة التشنجية دي ضد محمد الشوربجي، فليذهب ويكون خير ممثل لمصر، وعندنا دكاترة عظام يشار لهم أنهم مصريين في الخارج، الشوربجي مش لحم كتافه من خير البلد، وبصراحة الولد تحت إغراء غير طبيعي وهو عارف وقدم ودفع دينه وليذهب فهو من الطلقاء ومصر خدت شبابه كله".
ضغط محمد صلاح
ولفت: "في الفروسية كمية الفرسان اللي أخدوا جنسيات أوروبية وأمريكية كتير جدًّا، وكمان لو بصينا في ملف آخر اللي اتعمل في محمد صلاح الشهر اللي فات بمصر لا يمكن تحمله في حين أن الراجل في إنجلترا ملك مصري، عندنا جوهرة نحافظ عليها".
مناشدة عمرو أديب
و استطرد: "اهدوا شوية على الشاب محمد الشوربجي القرار بالنسبة له صعب بس ولكن هو مش قاعد في مصر ويتحدث الإنجليزية أفضل من العربية وتعالوا نلحق العلماء والدكاترة والمهندسين واللي باقيين".
وأعلن الاتحاد الإنجليزي للإسكواش، تغيير ولاء محمد الشوربجي لاعب منتخب مصر، ليلعب باسم المملكة المتحدة خلال الفترة المقبلة.
وفيما يلي بعض المعلومات التي قد لا تعرفها عن محمد الشوربجي:
- يبلغ عمره 31 عامًا، وبدأ ممارسة الإسكواش في سن مبكرة.
- يحتل حاليًّا المركز الثالث عالميًّا.
- احتل صدارة التصنيف الدولي خلال الفترة من 2014 وحتى 2021.
- توج بلقب بطولة العالم، وثلاثة ألقاب من بطولة إنجلترا.
- يحتل المركز السادس في قائمة أكثر اللاعبين حصدًا للبطولات بـ44 لقبًا.
- يعيش في إنجلترا منذ أن كان عمره 15 عامًا، حيث التحق بمدرسة ميلفيلد في سومرست.
- لعب الإسكواش تحت وصاية المدرب الأسطوري جوناه بارينجتون.
- حصد لقبه الأول في بطولة العالم بعد الفوز على شقيقه مروان الشوربجي في مانشستر.
