عروس كفر الدوار باكية: بوظوا عليا فرحتي.. وهذه حقيقة طلاقي | فيديو
بكت أمنية طارق عروس كفر الدوار، على الهواء، بعد تصدرها التريند عقب عقد قرانها، قائلة: "أنا معملتش أي حاجة والله، ولقيت نفسي مبتهدلة خالص ومش عارفة ليه كل ده".
مكافأة زوج عروس كفر الدوار
وقالت خلال مداخلة هاتفية ببرنامج "الحكاية" الذي يقدمه الإعلامي عمرو أديب بقناة "إم بي سي مصر": "كان كتب كتابي عادي وأهلي حاضرين وأهل جوزي حاضرين، وكنت ناوية أقول له رد فعل مني بسيط على أي حاجة حلوة هو بيعملها معايا كمكافأة منه له، وأقول له كلمتين كويسين قدام الناس اللى موجودة".
دموع عروس كفر الدوار
وتابعت: "أنا مش هلاقى أرجل من زوجي، ولما لقيت دموع أهلي في عنيهم لأني بنت وحيدة، فقلت له: خللى بالك من أهلي، وكنت مرتبكة جدا وحركاتي كانت ارتباك وكنت متوترة، وفجأة لقيت نفسي كومنتات سلبية وجوزي متبهدل والدنيا صعبة، وأصحابي هما اللى صوروا وهما كانوا فرحانين بيا".
موقف زوج عروس كفر الدوار
ولفتت عروس كفر الدوار: "جوزي متضايق جدا لأن الكومنتات زي الزفت وصعبة، وبيبهدلونا وكسروا فرحتنا، وده ميرضيش حد اللى إحنا فيه ده ومش عارفين ننام حرفيا، وجوزي زعلان عليا، وقال لى الكلام اللى قلته مفيهوش أي غلط، وجوزي دت مخترتهوش بالساهل.. حد كويس ومحترم جدا وسيد الرجالة، وانا خارجة من بيت علمني الراجل راجل والست ست فاختياري ليه كان بتأني.. فكنت حابة أبسطه وسط كل اللى قاعدين لأني بحبه وحبيت أشكره وأقول له قد إيه أنت أعظم انتصاراتي".
حقيقة طلاق عروس كفر الدوار
وأكدت: "إحنا متطلقناش ولا حاجة.. بس الأمور مش لطيفة والدنيا صعبة ومضغوط علينا وأنا متهانة جدا ونفسيتي زي الزفت، وأقل حاجة أقدمها لأهلي إني أوصي زوجي عليهم".
رسالة عروس كفر الدوار لزوجها
ولفتت: "كتبنا الكتاب والفرح كان المفترض في شهر 11، أنا معملتش حاجة وحشة.. إيه المشكلة إني أشكر في أهلي وبوظوا عليا فرحتي، وجوزي راجل وسيد الرجالة وحد محترم ومندمتش ولا هندم إني اخترته".
عمل زوج عروس كفر الدوار
وأشارت: "جوزي إداري في معرض عربيات والده، وأنا بحبه ومبسوطة بوجوده في حياته، وأنا مقلتش حاجة مخلة أو خليعة أو تهينني أو تهين جوزي".
