وصفها نشطاء السوشيال بـ«المستفزة».. أول تعليق من عروس البحيرة على شائعة طلاقها
نفت أمنية طارق، عروس البحيرة، التي أثارت جدلا بفيديو استفز نشطاء مواقع التواصل الاجتماعي بتهديدها لخطيبها أثناء عقد قرانهما، طلاقها من زوجها.
وكانت أنباء ترددت عبر السوشيال ميديا أنه تم تطليقها بعد عقد القران بسبب كلامها لزوجها عند عقد القران بأنها لن تترك أهلها "بالساهل" وأن على زوجها أن يضع أهلها نصب عينيه وخاصة أمها، حيث أثار حديثها في عقد القران الجدل والسخرية منها، ووصفها النشطاء بـ "المستفزة".
أول تعليق لعروس البحيرة
وجاء أول تعليق للعروس أمنية طارق "مشاء الله ع السوشيال ميديا وحوارتها"، ردًا على أحد نشطاء مواقع التواصل الاجتماعي أحمد حلاوة الذي قال "عاجل: طلاق العروسة المنتشر لها فيديو تهدد فية خطيبها أثناء كتب الكتاب."
وتفاعل عدد من أصدقاء أمنية، وقاموا بالتعليق على خبر طلاقها فعلقت أمنية حمدي هارون قائلة: "والله يا أمنيه انتى اللى بايدك توقفى المهزله اللى بتحصل دى لو بطلتى تشيرى بوستاتهم".
وقال علاء منصور "عادي ياجماعه ممكن مامتو هيا ال كانت عروسه واتطلقت عادي مش امنيه".
وردت هدير مصطفى "بعد الشر ربنا يتمم ليكم ع خير".
استفزاز النشطاء
وكانت أمنية طارق، المعروفة بعروس البحيرة، استفزت نشطاء مواقع التواصل الاجتماعي بتهديد خطيبها أثناء عقد قرانها طالبة منه أن يضع أهلها في عينه، وأنهالت تعليقات نشطاء مواقع التواصل الاجتماعي على صفحة أمنية بالفيس بوك، تفاعلًا مع ما حدث في عقد القران.
فقالت خلود البدوي "بنت ف ليله كتب كتابها قالت عايزه اقول كلمتين وراحت قايله كلمتين لخطيبها انا ماليش دعوه ده تصرف صح ولا غلط ولا ينفع ولا مينفعش بس ليه يجماعه الكومنتات عندها دي انها وحشه وبارده ودمها تقيل وكلام سلبي اووي احنا مالنا يجماعه طيب ليه نعكنن علي واحده ف ليله كتب كتابها الله اعلم مستنيه اليوم ده من قد ايه يعني دي لا ممثله ولا بلوجر ولا شخصيه مشهوره نقول متعوده ع أنها تشوف رأي وحش ولا حلو وميفرقش معاها بنت زيها زينا عاديه اووي احنا مالنا باللي هي عملته.. يجماعه وارحمونا"
اعتذري
وردت أميرة فوزي صديقة العروس أمنية "هو ليكي حرية التعامل بس ممكن تقفلي صفحتك تخليها خاصه لحد م الحوارات دي تخلص عشان الكومنتات السلبيه كترت وحقيقي زعلانه جدًا كسرو فرحتك بالي عملوه دا وانا مش شايفه انك قولتي حاجه غلط والله حسبي الله ونعم الوكيل ف ممكن تخصصي صفحتك للاصدقاء بس لفتره وبعدين افتحيها"
وعلق فتحي أحمد "هي البنت دي غلطت في ايه تتهاجم عليه ده كله، واحدة بتقوله أنت أعظم وأفضل اختياراتي وبتطلب منه يرعي أهلها زي ما هترعي أهله لا تطاولت عليه ولا قالتله أمه نوديها دار مسنين ومتقعدش معانا، بعدين بتقول أمي ثم أمي ثم أمي دليل علي حبها لمامتها ولو انتوا شايفين ان هي قصرت في حق والدها فهي قالت وحبيبي كمان عشان ميزعلش، أنتوا بتهاجموها عشان بتتشرط عليه يرعي أهلها ولا عشان إيه، بنت جميلة وعفوية شكلا ومضمونا وباين عليها محترمة، ربنا يهديها لجوزها ويخليهم لبعض"
ونصحها أحمد حسن قائلًا: "ربنا يهديكي يا بنتي ويبارلك في زوجك. اطلعي اعتزري عن اللي حصل يا بنتي بدل التبرير ده كله الكبر وحش والفرحه بالشهره المزيفه وحشه انا قعدت اقلب في البروفيل عندك علشان اشوف توضيح واعتزار ملقتش غير كبر وعناد فربنا يهديكي بقي"
أما إسلام حامد فقال "اللي عملتيه ده الصح ومن حقك تشرطي عادي وجوزك طالما قبل بشروطك خلاص انتو حرين واوعي تسمعي كلام حد حتي كلامي"
ورد أحمد علي "مكانش لازم الكلام دا يتقال بصراحه، طالما واثقه فيه وواخدين بعض عن حب ليه تقولي كدا م تقولي بينك وبينه مثلا ليه قدام الكاميرات والجو دا"
