ندى خريجة الإعلام.. تطلق مبادرة لتأجير "أشيك" الملابس والفساتين.. فكرة خارج الصندوق
"ندى عصام" شابة مصرية خريجة كلية الآداب قسم الإعلام بجامعة عين شمس، اتخذت من 3 سنين قرارا إنسانيا ونبيلا ومُلهما تساعد من خلاله غيرها.. عملت إيه؟.
"ندى" من زمان وهي مهتمة بشراء الملابس، خصوصًا مع زيادة خبرتها في فهم التناسق اللي المفروض يبقى بين الألوان وبعضها، فبالتالي بقى عندها كمية كبيرة من الملابس والفساتين اللي كلها شيك جدًا!
طيب لحد هنا تمام والموضوع بيتكلم عن اهتمام شخصي!، إيه بقى القرار اللي هي أخدته ؟!.
مبادرة للبنات
"ندى" لما لقت إن كمية الملابس اللي عندها مختلفة ومتنوعة، وأنها كده كده أكيد مش هتكرر لبسهم إلا كل فين وفين؛ قررت أنها تطلق مبادرة للبنات إن اللي تحب تاخد أى قطعة من ملابسها أو فساتينها، على أساس إن البنت تستلفه منها تلبسه وترجعه تاني ده متاح وبشكل مجاني تمامًا !.
غريبة مش كده؟.. أكيد.. وأكيد فيه سبب خلاّها تاخد القرار.. سبب التصرف ده زى ما بتقول "ندى" في حوار مع صحفي إنها شافت إن فيه جوازات أو خطوبات أو مناسبات حلوة كتير ممكن تبوظ بسبب ارتفاع أسعار الفساتين أو إن البنت مش قادرة تخرج بحاجة بتجمع بين قدرتها على شرائها وبين أنها شيك وذوقها جميل فحبت تكون جزءا من الحل في الموضوع ده.. ده غير طبعًا حبها للخير وأنها زى ما بتقول حبت تشجع البنات وتدعمهم في اختيار لبسهن من خلال تعريفهن بأنواع وألوان الملابس اللي ينفع تبقى متناسقة مع بعض.
ربنا بيحفظ فاعل الخير
فيه ناس سألت "ندى": هل هي بتخاف لما تدي هدومها لحد يكون عنده أمراض أو كده، لكن ردها دايمًا بيكون إن ربنا على طول مع فاعل الخير وبيحفظه.. "ندى" بتحلم يكون لها برنامج تقدم من خلاله نصائح للبنات عن الموضة وتجمع فيه بين موهبتها وبين مجال دراستها.
المبادرة اللي عملتها "ندى" ولسه مستمرة فيها من 3 سنين لحد دلوقتي تصرف نبيل، وغير إن ثوابها كبير فهي كمان هتكون باب إن ربنا يوفقها هي برضه في تحقيق حلمها هي الشخصي.
