ابنة شويكار: ماما كانت بتطبخ لفؤاد المهندس لآخر لحظة من حياته وتبعت له الأكل | فيديو
قالت منة الله الجواهرجي، ابنة الفنانة الراحلة شويكار: "فؤاد المهندس كان بالنسبة لي أبا عظيما وأخلاق وطيبة وحنية وخفة دم".
شخصية فؤاد المهندس
وتابعت خلال مداخلة هاتفية ببرنامج "مساء دي إم سي" المذاع على قناة "دي إم سي": "فؤاد المهندس رباني، وكان إنسانا جميلا جدا، وعلمني حاجات كتير، وأكتر حاجة علمهالي تحمل المسئولية والالتزام واحترام العمل، وكل حاجة بنعملها بحب وإخلاص".
علاقة ابناء فؤاد المهندس بابنة شويكار
وأضافت: "العلاقة بيني وبين محمد وأحمد فؤاد المهندس علاقة أشقاء رغم أننا مش إخوات، وعلاقتنا مستمرة حتى هذه اللحظة، وولادي بيقولوا لأحمد ومحمد يا خالو، وعمر ابن محمد فؤاد المهندس بيقولي يا عمتي".
كيميا فؤاد المهندس وشويكار
وتابعت: "كان فيه كيميا فظيعة بين فؤاد المهندس وشويكار، وهو اشتغل مع غيرها وهي اشتغلت مع غيره لكن شغلهم مع بعض كان مميزا ومختلفا".
نصف تفاحة شويكار
وأردفت: "شويكار كانت بتقول عن فؤاد المهندس أنه هو أستاذها وحبها الأول والأخير، ولحد آخر ثانية في عمره كانت بتطبخ له وتبعت الأكل علشان مياكلش غير من إيديها وحب العمر كله، وكانت دايمًا بتقول هو نصف التفاحة بتاعتي".
رأي فؤاد المهندس
وتابعت: "شويكار كانت بتاخد رأي فؤاد المهندس في كل أعمالها، ولما بيقول كلمة كأنها أنزلت عليها علشان هو أستاذها واللى معلمها، وأول من قدمها للجمهور".
