ليلى غفران تدخل في نوبة بكاء بسبب وائل الإبراشي | فيديو
قالت الفنانة ليلى غفران: "بليغ حمدي وسيد مكاوي ومحمد الموجي هم أصحاب الفضل عليا واللي جابوني مصر"، لافتة: "أغنية "بودعك" اتعملت في لندن وأنا كنت حاضرة وهي بتجهز وكان المفروض أغنيها بس مكنتش لسه جيت مصر فغنتها الراحلة وردة الجزائرية".
سبب الغياب عن الغناء
وأضافت خلال لقائها ببرنامج "كلام الناس" المذاع على قناة "إم بي سي مصر": "توقفت 4 سنين عن الغناء بسبب خلافي مع الشركة المحتكرة لصوتي".
أغنية أسهلهالك
وأردفت: “أول لما نزلت أغنية ”أسهلهالك" فلقيت مطربة بتكلمني وبتقولي هو إنتي تنامي تنامي وتطلعلنا بحاجة تضرب".
اسم الشهرة
وتابعت: "أبويا مكنش يعرف إني بغني لفترة طويلة بعد لما سافرت من المغرب لفرنسا، وعرف لما اتشهرت في مصر، وكنت وقتها مستقوية بإني اتجوزت، وأنا غيَّرت اسمي من جميلة إلى ليلى غفران خوفًا منه لأنه كان متدين، لكن فرح لما عرف إنى اتشهرت"
عمليات التجميل
واستطردت: "أنا مع عمليات التجميل، وبستغرب من الناس اللى بتعمل تجميل وبتخبى وبتقول أنا مش عاملة، إحنا بنصلح في عيوب الزمن أو عيوب خلقية، ومش بنأذي حد ليه نخبى أننا بنعمل عمليات تجميل وليه نكذب".
صلاة الفجر في الحسين
ولفتت: بحب أسمع مروان بابلو وويجز، وبحب أزور سيدنا الحسين وأولياء الله الصالحين، وبحب أصلى الفجر في الحسين، وأكتر دعوة بدعيها دايمًا الستر والرضا، والفترة الأخيرة مواظبة على الصلاة وقراءة القرآن الكريم، وأنا عاشقة للشيخ النقشبندي ومن الأصوات الرائعة وبحب ابتهال "مولاي".
بكاء ليلى غفران
وبكت ليلى غفران، عند عرض صورة الإعلامي وائل الابراشي، قائلة: "حبيبي أنا فوجئت برحيله.. أطيب قلب وأنضف إنسان، وكان نفسي أكلمه بس كنت عيانة وظروفي كانت صعبة".
غناء أغاني عبد الحليم حافظ
وعن عبد الحليم حافظ، قالت: "لما غنيت جبار كان عندي رعب ومحمد الموجي قاللى اهدى وخوضي التجربة، فقلت له أنا بتهاجم دلوقتي من الصحافة فما بالك لو الألبوم نزل وفيه جبار وحبك نار وكامل الأوصاف، فقالى متخافيش وخوضي التجربة، وأول لما عرفت أن الأغاني هتنزل مشيت وطلعت على باريس وقلت لأقعد هناك وأرجع وأنا رافعة رأسي، ولما نزلت الأغاني عملت ضجة وقلت هرجع ورجعت في المطار لقيت الناس حابة صوتي".
