عصام الحضري يرد على سخرية شوبير منه | فيديو
رد عصام الحضري مدرب حراس مرمى منتخب مصر، على سخرية الإعلامي أحمد شوبير من لهجته في بداية مشواره الكروي وقوله إنه لا يصلح لأن يكون إعلاميًّا رياضيًّا.
لهجة عصام الحضري
وقال عصام الحضري خلال لقائه ببرنامج "العرافة" المذاع على قناة "المحور": "أنا أفتخر بوضعي ولهجتي في بداية مشواري وإلا ما كنتش وصلت لما وصلت إليه".
رد الحضري على سخرية شوبير
وتابع: "أنا عمري ما بزعل من حد وأنا ما عرفش ليه الكابتن شوبير بيسخر مني أو بيقلل مني، وأنا مش زعلان منه بدليل إن في خطوبة بنتي كنت عازمه وهو ما جاش علشان كان عنده حلقة في نفس التوقيت، ولو شايل منه ما كنتش عزمته، وعمري ما فكرت إني اشتغل إعلامي وأنافسه، والحاجات اللي ضدي باخدها جوايَ وبتديني طاقة".
وكشف عصام الحضري مدرب حراس مرمى منتخب مصر، في نفس اللقاء، كواليس جديدة عن أحداث مباراة السنغال في العاصمة داكار.
شحن الجماهير السنغالية
وقال: "قبل مباراة السنغال في داكار رأينا حالة شحن كبير ضد منتخب مصر بلاعبيه وجهازه الفني والإداري والطبي".
الاعتداء على الحراس
وأضاف: "لما جينا نسخن في الملعب لقينا زجاج مياه وطوب بيتحدف علينا، وأنا بسخن الحراس ما كنتش بشوف الكورة من كتر ما الليزر كان متسلط علينا، كمية الليزر كانت بتغطي اللاعيبة، والفانلات الحمراء بتاعتنا لونها تحول للأخضر".
موقف غربال ومراقب المباراة
وتابع: "اتكلمنا مع حكم المباراة مصطفى غربال قال لنا الموضوع كله مع المراقب ولما روحنا للمراقب قال لنا هبطل الليزر ونوقف حدف الطوب وزجاجات المياه".
youtube
وأكمل: "كانت هناك آلاف من الليزر في ملعب السنغال، ولو كلمنا الحكم يوقف الماتش كان هيحطنا تحت ضغط ويعملنا مشكلة، وقلنا لمصطفى غربال على زجاجات المياه اللي اتحدفت عليه ومعملش حاجة".
سبب إخفاق محمد صلاح
وأشار: "الشناوي لما صد ركلة الجزاء مكنش الليزر مسلط عليه بشكل مكثف إنما محمد صلاح وهو بيشوط ضربة الجزاء كل الليزر كان ضارب في وشه وده أثر في تسديده للكورة، وأنا بمران الحراس أثر فيَّ".
سباب وشتائم جماهير السنغال
ولفت: "الإذاعة الداخلية لملعب السنغال كانت بتشحن الجماهير، وما كناش متوقعين إن الأجواء دي في الملعب وتعرضنا لألفاظ وسباب من أول ما دخلنا في المطار".
وأوضح: "علشان نوصل الملعب من الفندق استغرق مننا ساعتين ودي عمرها ما تحصل، ووصلنا الملعب قبل الماتش بساعة ودي حاجة غريبة واللاعب ما يلحقش يلبس ولا يسخن ولا يعمل إطالات، وطول الطريق واحنا ماشيين في اتجاهنا للملعب زحام فوق ما يمكن تصوره، وكان فيه فندق قريب للملعب بحوالي 10 دقايق وبسبب منتخب السنغال رفضوا".
طلب محمد صلاح
وأكد: "محمد صلاح طلب يسدد ركلة الجزاء الأولى أمام السنغال".
