أحمد فلوكس: اتجوزت 3 مرات رسمي و2 عرفي منهم مرة بعد انفصالي عن هنا شيحة|فيديو
كشف الفنان أحمد فلوكس، خلال لقائه ببرنامج "حبر سري" الذي تقدمه الإعلامية اسما ابراهيم بقناة "القاهرة والناس"، عن عدد زيجاته.
زيجات أحمد فلوكس
وأكد أحمد فلوكس:" اتجوزت 3 مرات رسمي ومرتين عرفي منهم زيجة بعد طلاقي من هنا شيحة لأني مكنتش عايز الناس تعرف حياتي الشخصية واتعقدت من الحكاية دي".
أفضل زيجات أحمد فلوكس
ولفت:"أحسن وأحلى واحدة اتجوزتها وبعتبرها هدية ربنا ليا هي أم ابني واللى إحنا مع بعض دلوقتي، ولما نضجت عرفت إنها أجمل هدية ربنا بعتهالي خصوصا إنها انتظرتني 12 سنة بعد لما انفصلنا".
وقال الفنان أحمد فلوكس في نفس اللقاء:"ما أعتزلتش الفن لأنه حرام، أنا بحب اللى بعمله وكنت وما زلت بحب الفن لأني بعتبره رسالة مهمة وخاصة الدراما فهي تشكيل لوجدان الأجيال الصغيرة قبل الكبيرة واتربينا علي "المال والبنون" و"ليالي الحلمية" و"رأفت الهجان".
أمنية أحمد فلوكس
وتابع:"انا مقولتش الفن حرام، ولا ادروشت ولا استشيخت ودي حاجة مش عيب دي منزلة ربنا بيرفع فيها الناس لمن يستحق، وأتمنى في يوم من الأيام أوصل يبقى عندى علم ويتقال عليا شيخ".
رسالة الأديان
وأكمل:"أرفض أي شيء يتنافى مع أخلاقنا وعاداتنا وتقاليدنا، الممثل بيدخل بيوت الناس ومينفعش الغلط اللى بيعمله في حياته الشخصية يدخل بيوتنا وفيه محرمات في جميع الأديان لازم نلتزم بيها".
وأكد الفنان أحمد فلوكس، في نفس اللقاء، اعتزاله التمثيل في مصر نهائيًا، لافتًا إلي أنه خاض التجربة منذ 20 عامًا وبدأ المشوار كومبارس حتي حصل علي جائزة أفضل ممثل في الوطن العربي وليس لديه جديد يعطيه.
شركة إنتاج أحمد فلوكس
وأضاف خلال لقائه ببرنامج "حبر سري" الذي تقدمه الإعلامية اسما ابراهيم بقناة "القاهرة والناس":"أنا مش عايز أمثل تاني وهعمل شركة إنتاج ووقعت مع الناس اللى هيمثلوا".
نجل فاروق فلوكس
ولفت:"رغم إنى ابن فاروق فلوكس إلا أنني بدأت المشوار من الصفر واتعلمت حتى وصلت للبطولة، وأنا معنديش بابا بيعطي أمر وخد وروح اشتغل".
