ملوش علاقة بالدين.. تعليق ناري من تامر حبيب على منشور إفطاره في نهار رمضان
خرج السيناريست تامر حبيب عن صمته، بعد إثارة الجدل بمنشور له عبر حسابه الرسمي على موقع التواصل الاجتماعي “فيس بوك”، أعلن فيه أنه يعاني من أزمة صحية تجبره على الإفطار في رمضان.
في هذا السياق، كتب تامر توضيح عبر حسابه على “فيس بوك” بعدما أثار الجدل قائلًا: “طيب، تعقيب على البوست اللي فات واللي كتبت فيه عن إفطاري في رمضان بسبب أزمة صحية وإنني أشعلت سيجارة في نهار رمضان في الشارع منتظرًا أي متطفل أو متدخل يسألني عما أفعل لأرد عليه بأشد الكلمات والعبارات”.
وتابع: “أنا تفاجأت من بعد ما نزلت البوست بربع ساعة باتصالات لامنتهية ولغاية دلوقتِ حالًا وإن البوست اتعمل له أكثر من ٣٠٠ شير! واللي عرفته إن كالعادة حصل عليَّ هجوم رهيب واتشتمت وجبت الشتيمة لأمي وأبويا الله يرحمهم في الأيام المفترجة دي، وربنا يجعله في ميزان حسناتنا، واتقال لي إن البعض كفروني كمان والمتسامحين منهم اتهموني بالجهر بالمعصية”.
وأضاف: "و طبعًا لأني بشتغل في الفن وراجل حر ومؤمن بالحرية وبحضر حفلات ومهرجانات وأعياد ميلاد وبرقص وأضحك وأهرج وأحاول أن استمتع ويكون حضوري إيجابي وصحبتي مش تقيلة، وبحترم نفسي وبحترم الآخر وأحترم حريته، ويمكن علشان كده الحمد لله ربنا محبب فيا ناس كتير وألف حمد وشكر ليك يا رب وديم عليا النعمة دي واحفظها من الزوال، عرفت برضه إن السلخ جامد قوي، وبجد ورحمة أمي وأبويا أنا ما قريت أي تعليق سلبي أو إيجابي غير اللي على البوست هنا، واعتذرت لكل الأساتذة المعدين اللي طلبوا مني أعمل معاهم مداخلات أوضح فيها موقفي وأدافع عن نفسي من التعليقات واعتذرت لهم جميعًا مشكورين لأني مش شايف إنه موضوع ولا من هواة التريندات وما بحبهاش"
وواصل: “أنا بس عايز أوضح لي اللي نيتها أو نيته صافية من اللي ممكن يكونوا فهموا البوست غلط، او ما وصلهومش اللي قصدته، واكرر بأوضح فقط للناس اللي نيتها صافية، ودول اقلية قليلة جدًا زي ماحنا عارفين، والباقي واللي هما الاغلبية العظمي بنواياهم المختلفة الغير صافية ولا محترمة واللي كلنا بقينا عارفينهم كويس مش فارقين معايا بالمرة والمصحف الشريف، ولا توضيحي هايفرق معاهم علشان هنا كده كده هما هايبخوا سمهم عشان ده أكل عيشهم”.
وأضاف: “آسف علي الإطالة، ارجع واقول حابب اوضح لأصحاب النوايا الطيبة، اني قصدت بالپوست السابق، اني استفزني الخبرين اللي قريتهم وقلقوني لما يحتويه ما بين سطورهم من خطورة علي مجتمعنا اللي اتربيت طول عمري علي انه مجتمع وسطي يحترم الآخر، واهلي علموني ماخفش من التفكير، وان عقلي ده نعمة عظيمة من ربنا حرام عليا ماستخدمهاش".
واستطرد: "من قبضتي وضيقي، عبرت عن غضبي باني شربت سيجارة ومية في الشارع، احتجاجًا علي ما استفزني… يعني لا إجهار بمعصية، لإني اصلًا مش قابل ان يتقال عليها معصية، ولا الموضوع ليه اي علاقة بالدين ولا العقيدة… اللي اصلًا مافيش مخلوق علي وجه الارض مسموحله يتدخل فيها… انا قصدت اقول ان استفزازي من اللي قريته، زاد من غضبي وعدوانيتي، وده انا شايفه خطر، وكتبت في الپوست انه خطر كبير، لأنه فعلًا خطر كبير… مرة تانية آسف علي الإطالة… ورمضان كريم يا كل المصريين وكل الناس اجمعين… وربنا اسمه الرحيم ”.
