عمرو يوسف: اللي عمله محمد رمضان غريب عن تربيتي | فيديو
قال الفنان عمرو يوسف: "ما زعلتش من محمد رمضان لما قال إنه ممكن يعمل "أحمس" وإنه مش حكر على الزميل الموقوف".
موقف محمد رمضان
وأكد خلال الجزء الثاني من لقائه ببرنامج "حبر سري" الذي تقدمه الإعلامية أسما إبراهيم بقناة "القاهرة والناس": "ما زعلتش من محمد رمضان لما مسلسل "الملك" بتاعي اتوقف، ولكن لو كنت مكانه مش هعمل كده، وطريقة تفكيره بعيدة عن طريقة تفكيري أو اللي اتربيت عليه أو اللي أنا شُفته من أساتذتنا وزملائنا".
كارثة عمرو يوسف
وأضاف: "ما ينفعش حد يبقى في مطب أو مشكلة، وأطلع أقول إن الدور اللي بيعمله مش حكر عليه وإني ممكن أقوم بدوره، ما كنتش أتخيل إن محمد رمضان يعمل اللي عمله، لإن فيه ناس في كارثة وشركة إنتاج وممثلين في مشكلة ومسلسل كبير اتوقف، فهل يجوز إني أطلع أقول اللي محمد رمضان عمله معايا، وبجد غريبة على تربيتي في بيتي وفي شغلي".
رسالة عمرو يوسف لمحمد رمضان
ولفت: "أنا ومحمد رمضان مش صحاب، وربنا يوفقه ويعمل اللي يعمله وبتمنى الخير لكل الناس".
وكشف الفنان عمرو يوسف، في نفس اللقاء لأول مرة الأسباب الحقيقية لإيقاف مسلسل "الملك" الذي كان من المقرر عرضه في رمضان الماضي.
كواليس إيقاف مسلسل الملك
وقال: "في عز الدوشة عن وقف عرض مسلسل الملك، فضلت إني ما أتكلمش ولا أصرح بأي تعليق لإن التجويد كان زيادة عن اللزوم وآراء من الشرق والغرب وفي وقت المشاكل الكلام بيتحول إلى لعبة اللوم، أنا كممثل أطلع ألوم المخرج والمخرج يطلع يلوم الشركة المنتجة وهنبتدي نلوم في بعض، في حين إنه محدش عمل خطأ بقصد، والدليل على كدا إن نفس شركة الإنتاج لو كان المخرج مش كويس ما كانوش بيشتغلوا معاه مسلسل كبير السنة دي زي "جزيرة غمام" وما كانش الشركة اتعاقدت معايا تاني".
شائعة عمرو يوسف الكارثية
وتابع: "طلعت عليا شائعات كان فيها لغط ومن بينها شائعة كارثية إني ما رضيتش أحلق دقني وأعطت إيحاء خاطئًا تمامًا عني وعن فهمي للشغلانة، وأنا راجل محترف وتتلمذت على إيد راجل من قمة المحترفين وهو الفنان الراحل نور الشريف، ومفيش حاجة اسمها مش راضي أحلق دقني".
شخصية عمرو يوسف
وأكمل: "الشخصية بتاعتي في المسلسل بتبقى من غير دقن ولا شعر في الحلقات الأخيرة، ودراميًّا أخدنا المسلسل من رواية كفاح طيبة للأديب العالمي نجيب محفوظ، والرواية فيها دراما وخيال المؤلف واحنا أخدنا خيال نجيب محفوظ وحطينا عليه خيال الكتاب الشاطرين جدًّا شيرين دياب ومحمد دياب وخالد دياب، وعملنا مسلسل 30 حلقة أعتقد إننا لما قرأناه انبسطنا بيه كلنا جدًّا من مخرج وشركة إنتاج وممثلين".
برومو مسلسل الملك
ولفت: "لما نزل برومو المسلسل حصل بعض الاعتراضات وناس كتير رأت إن فيه أخطاء كتيرة فيما يتعلق بشكل التاج أو الدقن، ويقال إن ده ما كانش موجود ساعتها، فالناس ما عجبهاش الموضوع فشركة الإنتاج قررت توقف المسلسل، وأنا بالنسبة لي بقدم المنتج للمشاهد".
الملك أحمس
وأكمل: "احنا ما كناش بنؤرخ للملك أحمس، ولكن كنا بنعمل رواية نجيب محفوظ، وكل الناس في الوسط كانوا معايا و80 نجم من نجوم مصر عملوا لي هاشتاج فيه دعم".
مفاجأة عن تصوير مسلسل الملك
وأشار: "نفسيًّا كنت متضايق جدًّا لأني بذلت مجهود كبير جدًّا، وكان فاضل لنا 10 أيام ونخلص المسلسل، وخلصنا تقريبا المسلسل، وأحبطت وحسيت إن مجهودي الكبير راح في الهوا، ونفسيًّا كنت تعبان جدًّا، أنا مش ضعيف وبحب إني أحارب.. بس في المسلسل دا كنا حاسين إننا عاملين حاجة كبيرة وضخمة، ولذلك لما العمل اتوقف كنا محبطين جدًّا".
إحباط عمرو يوسف
وأردف: "زعلان على مجهودي ومجهود الناس اللي كانت معايا، وكنا بنصور في الفيوم والمنوفية، وتعرضنا لمشقة كبيرة لأننا كنا بنصور في أرض زراعية في عز التلج وبنبدأ تصوير من 5 الفجر، والموضوع كان صعب جدًّا على اللي قدام الكاميرا واللي ورا الكاميرا".
عرض مسلسل الملك
وتابع: "أتمنى يكون فيه أمل والمسلسل يشوف النور بعد المجهود الكبير اللى عملناه، وأنا مش ببدأ المسلسل إني ملك، لكن ببدأ إني أنا من عامة الناس ومتخفي، واللي حاصل هما الكهنة والملوك والمصري عمومًا حصل في فترة انتشر فيها الحشرات والأمراض زي القمل فالناس كانت بتحلق شعر جسمها حتى الستات، والتفاصيل ممكن لم نوفق فيها ولكن قدمنا كل ما لدينا".
