أبو جبل يكشف حقيقة اعتزال محمد صلاح.. وموقفه كبديل لمحمد الشناوي | فيديو
قال محمد أبو جبل، حارس مرمى نادي الزمالك ومنتخب مصر: "فيه ناس مستكترة عليا النعمة، والظهور على شاشة التليفزيون بعد النجاح اللي حققته مؤخرًا مع المنتخب".
بديل محمد الشناوي
وأضاف خلال لقائه ببرنامج "كلام الناس" المذاع على قناة "إم بي سي مصر": "مصعبتش عليا نفسي لما بقيت بديل لمحمد الشناوي في مباراة السنغال، والأهم كان بالنسبة لنا الصعود لكأس العالم أيًّا كان مين موجود، وفترة صعبة بنعيشها بعد تبخر حلمنا، ولكن هنعوض في اللي جاي".
حقيقة اعتزال محمد صلاح
ولفت: "محمد صلاح شخصية جميلة جدا، وأعطى لمصر والمنتخب كتير جدا، وكلنا بنحبه ونحترمه ولم يلمح للاعتزال الدولي، وهو مكمل مع مصر وصورة مشرفة لمصر ولينا".
وكشف محمد أبو جبل، حارس مرمى نادي الزمالك ومنتخب مصر، في نفس اللقاء، كواليس مشاجرته مع جماهير الفارس الأبيض عقب الخسارة من الوداد المغربي.
مشاجرة أبو جبل مع جماهير الزمالك
وأوضح: "بعد الخسارة من الوداد المغربي اتصور لي خناقة مع الجمهور في الشارع، وكنت حزينًا على اللي حصل، والجمهور كسر لي العربية، واتشتمت بأفظع الشتائم اللي محدش يقدر يستحملها، وواحد من الجمهور واقف قدام العربية مش عايز يتحرك أدوسه مينفعش فنزلت وقلت حقكم عليا فاتشتمت، وقاللي إنتوا لعيبة مينفعش تفضلوا في النادي".
انقلاب الجماهير على أبو جبل
وأكمل: "مش عارف الجمهور قلب عليا ليه من الحارس اللي في السما بعد بطولة أمم أفريقيا، وبعد كده نزلوني في سابع أرض".
وقال محمد أبو جبل حارس مرمى نادي الزمالك في نفس اللقاء: "أنا باق مع الزمالك وليس صحيحًا ما تردد عن توقيعي لنادي النصر السعودي".
تنازلات أبو جبل مع الزمالك
وتابع: "أنا ملتزم بعقدي مع نادي الزمالك، وباق في بيتي الأساسي، وقدَّمت تنازلات كتيرة علشان أرجع للزمالك من سموحة ومنهم عقود احتراف ألغيتها كلها".
تجديد عقد أبو جبل
وأكد: "قسمًا بالله ما حصل إنى طلبت مليون دولار في الموسم علشان أجدد مع نادي الزمالك، ومش هغالي على نادي الزمالك، ولما رجعت للنادي وقعت على بياض، بس كان فيه وعد إن عقدي يتغير لما أشارك بصفة أساسية، وانا كنت جاي حارس تالت والجمهور قال عني دي صفقة فاشلة، ولكن كان عندي إصرار أكون حارس أول، وتفوقت على نفسي وعلى الظروف اللي حواليا ودلوقتي أنا أساسي في نادي الزمالك".
