أبو جبل: متخانقتش أنا وجنش بسبب القاضية ممكن.. وأفشة صاحبي وبنتسحر سوا | فيديو
قال محمد أبو جبل، حارس مرمى نادي الزمالك ومنتخب مصر: "محصلش إني اتخانقت مع جنش لما قاللي القاضية ممكن".
العلاقة مع أفشة
وأضاف خلال لقائه ببرنامج "كلام الناس" المذاع على قناة "إم بي سي مصر": "أنا وأفشةأصحاب، وساكن جنبي وبنتسحر مع بعض، ومعظم الوقت قاعدين مع بعض".
فضل والدة أبو جبل
ولفت: "أمي أكتر حد له فضل عليا في كرة القدم وفي حياتي كلها، ولكن ما وصلت إليه من مستوى الفضل فيه بعد أمي؛ نادي الزمالك".
شقيق أبو جبل وجنش
وأكد: "مش صحيح إن أخويا مصطفى بيأجر لجانًا إلكترونية علشان يهاجم جنش، والناجح دايمًا الناس بتهاجمه، والشجرة المثمرة بتتحدف بالطوب وأنا اتحدفت بالطوب لحد لما تعبت".
مسئولية النجاح
وأكمل: "إحنا متغرناش بعد بطولة الأمم الأفريقية، وكل ما اسمي بيكبر بتكون مسئولية، وبحاول أحافظ على النجاح، فأنا إزاي أهد النجاح اللي عملته".
حقيقة تغير أبو جبل
ولفت: "أنا أكتر حد متواضع في الدنيا، ومتغيرتش بعد بطولة أفريقيا، واللي يعرفني كويس وشخصيتي هو اللي يقدر يُحكم عليا، وأنا أكتر حد في الدنيا طيب، وعيبي طيبة قلبي وعصبيتي".
وكشف محمد أبو جبل، حارس مرمى نادي الزمالك ومنتخب مصر، كواليس مشاجرته مع جماهير الفارس الأبيض عقب الخسارة من الوداد المغربي.
مشاجرة أبو جبل مع جماهير الزمالك
وأوضح خلال لقائه ببرنامج "كلام الناس" المذاع على قناة "إم بي سي مصر": "بعد الخسارة من الوداد المغربي اتصور لي خناقة مع الجمهور في الشارع، وكنت حزينًا على اللي حصل، والجمهور كسَّر لي العربية، واتشتمت بأفظع الشتائم اللي محدش يقدر يستحملها، وواحد من الجمهور واقف قدام العربية مش عايز يتحرك أدوسه مينفعش فنزلت، وقلت: حقكم عليا فاتشتمت، وقاللي إنتو لعيبة مينفعش تفضلوا في النادي".
انقلاب الجماهير على أبو جبل
وأكمل: "مش عارف الجمهور قلب عليا ليه من الحارس اللي في السما بعد بطولة أمم أفريقيا، وبعد كده نزلوني في سابع أرض".
وقال محمد أبو جبل حارس مرمى نادي الزمالك في نفس اللقاء: "أنا باق مع الزمالك، وليس صحيحًا ما تردد عن توقيعي لنادي النصر السعودي".
