غادة عبد الرازق: بحافظ على جمالي بفلوس كتير.. وبطلت عمليات التجميل بعد اللي حصل في خدودي
قالت الفنانة غادة عبد الرازق: "الجمال أحلى حاجة في الدنيا، وبلعب رياضة، والكابتن بتاعي بيجيلي 4 مرات في الأسبوع، وأنا شبه مباكلش علشان أنا بحب الأكل موت ومش بيحلى الأكل إلا قبل النوم فبحاول أعمل تحكم في الموضوع ده".
خلطة غادة عبد الرازق للتجميل
وتابعت خلال الجزء الثاني من لقائها ببرنامج "كلام الناس" المذاع على قناة "إم بي سي مصر": "بحافظ على جمالي بفلوس كتيرة أوي، وبحب أحط كريمات على وشي وشعري علشان أحافظ على جمالي، وباستخدم مياه الأرز وبضيفله زيت زيتون وبعدين أحطه على وشي وشعري وبيشد البشرة وبيقوى الشعر".
نصيحة غادة عبد الرازق للسيدات
وأوضحت غادة عبد الرازق، عن وصفة للتعامل مع الرجال، قائلة: "اللى عايزة تمشي الراجل على عجين مايلغبطوش بأن المرأة تحترمه وتخليه يحترمها بالطريقة اللى هي عارفة أنها صح".
عملية تجميل فاشلة
وأضافت: "مش هلعب في ملامح وشي تاني لأني عملت عاملة سودة من سنتين، وفيه دكتور استأمنته وهو نفخلى خدودي وبوظلي وشي وقلت له وشي رفيع وأنا مش بتاعت الكلام ده أبعد عن المنطقة دي وضحك عليا وقعدت سنة ونص باشفط في وشي وقلت لهم مفيش حقنة تدوب النفخ ده وكانت مشكلة، ومبقتش أروح لدكاترة تجميل من ساعتها وبستخدم المكياج والإضاءة بس في التصوير".
وقالت الفنانة غادة عبد الرازق في نفس اللقاء: "لأول مرة منذ 14 سنة أغيب عن دراما رمضان وسايبة الملعب السنة دي لناس غيري تتواجد فيه واستراحة محارب لأن الجو العام اختلف والحسابات اختلفت وحاسة أنه مش هو ده رمضان اللي متعودة عليه السنين اللي فاتت، وبتفرج من بعيد وسايبة التمثيل شوية والدراما لغيري ودايمًا كنت بقول كلمة زمان أن التمثيل مبيخلصش".
رفض أعمال فنية
وتابعت: "محدش عرف يأخد مكاني، بيتعرض عليا أعمال وبرفض لأن هما متخيلين أنها مش لاقية شغل وده مش صح، والإنتاج لنفسي مش عيب وطبيعي".
موقف غادة عبد الرازق من دراما 2022
وأضافت غادة عبد الرازق: "أنا قاعدة السنة دي علشان نفسي أتفرج عليكم، وأشوفهم هما بيعملوا إيه، ومحدش فارق معايا مين يزعل ومين ميزعلش، وللأسف لما أنا زعلت محدش وقف معايا، أنا اللى عايزاه يزعل عليا جمهوري وأنا أزعل عليه".
وشاركت غادة عبد الرازق الجمهور مجموعة صور لخطوبة ابنتها، وعلقت قائلة: "تهانينا حبيبتي روحي كل شيء في هذه الحياة.. أتمنى أن تعطيك الحياة القادمة كل ما تريدين لأنك تستحقين.. أحبك كثيرًا".
وفي سياق آخر كشفت الفنانة غادة عبد الرازق لأول مرة عن سبب عدم حضورها المهرجانات المختلفة التي تُقام في مصر.
