غادة عبد الرازق: "بقطع في شعري وبتعالج عند دكتور نفسي" | فيديو
قالت الفنانة غادة عبد الرازق: "مسلسل "الكابوس" قبض قلبي وجابلي كآبة، وطلعت منه متدمرة لأنه أكتر مسلسل طلعت اللي جوا قلبي فيه".
دكتور غادة عبد الرازق النفسي
وأضافت خلال لقائها ببرنامج "كلام الناس" المذاع على قناة "إم بي سي مصر": "جالي اكتئاب، وروحت لدكتور نفسي وده بسبب مشاكل الدنيا وملهاش علاقة بالشغل، وبتبقى من حاجات كتير مريت بيها من صغري لحد لما وصلت لمرحلة النفسية ساءت لكني راضية بقضاء الله لأنه قصاده اداني حاجات أحسن بكتير".
انتكاسات غادة عبد الرازق وأدوية الاكتئاب
وتابعت: "باخد أدوية مضادة للاكتئاب، وبيجي عليا وقت انتكاسات بكون محتاجة أقعد مع الدكتور النفسي، وحاولت أبطل وأوقف أدوية وقلت للدكتور نقلل الجرعات فقاللي ممكن تبطلي تاخدي أدوية لكن لازم تهدي وتبطلي واحدة واحدة، وحاولت أول أسبوع ولكن مقدرتش وبقعد أقطع في شعري، ومحتاجة كورس في الخارج مدته 6 شهور علشان أتخلص من الأدوية وأغيِّر دمي اللي فيه أدوية من زمان".
وقالت الفنانة غادة عبد الرازق: "مليش حظ في الصحاب ودايمًا بيخنوني وبيعرضوني لمصايب، والسبب الوحيد اللي يخليهم يعملوا كده أنهم بيغيروا منِّي".
غادة عبد الرازق والوسط الفني
وأضافت: "وقفت جنب ناس كتير في أزماتهم وهما موقفوش معايا بس هما مش فارقين معايا، وعمري في حياتي ما قربت من حد في الوسط الفني، ووقفت مع ناس في وقت الشدة، وبعد لما شدتهم انتهت مسألوش فيا ولا عبروني".
نية غادة عبد الرازق
ولفتت: "ربنا يقعدلي نيتي الصافية، وكل الوقعات اللي وقعتها ربنا اللي خرجني منها مش بتوع الوسط الفني اللي وقفت معاهم".
العلاقة مع ياسمين صبري
وأشارت: "مرفضتش تقاسم البطولة مع ياسمين صبري ولكن القصة كانت متعلقة أن الورق مكنش جاهز إلا 3 حلقات، فاعتذرت وأنا بحب ياسمين".
حوت تمثيل
وأكملت: "جسمي بيقشعر لما بيقولوا عليا حوت تمثيل، وبحس أن ربنا أنعم عليا بنعمة كبيرة".
وشاركت غادة عبد الرازق الجمهور مجموعة صور لخطوبة ابنتها، وعلقت قائلة: "تهانينا حبيبتي روحي كل شيء في هذه الحياة.. أتمنى أن تعطيك الحياة القادمة كل ما تريدين لأنك تستحقين.. أحبك كثيرًا".
