اليوتيوبرز أحمد حسن وزينب يعلقان على قرار انفصالهما.. ويكشفان مصير قناتهما | فيديو

علَّق اليوتيوبرز أحمد حسن، وزينب، على قرار انفصالهما الذي أعلنه الأول قبل ساعات من خلال صفحاته الرسمية على مواقع التواصل الاجتماعي، موضحين أنهما سيظلان صديقين.

وقال أحمد حسن: "العنوان الموجود على الفيديو ده حقيقي، وإحنا مش حاطين العنوان علشان نجذب الناس، وعلشان تدخل تتفرج على الفيديو، لا الموضوع بجد".

وتابع: "طبعًا يا جماعة كلكم عارفين إنه أنا وزينب بقالنا 4 سنين متجوزين، وربنا رزقنا بأيلن، وآيان، بس إحنا قررنا الانفصال، والأسباب مخلينها لنفسنا شوية، وكان لازم نطلع نشارككم اللحظة دي، لأنه إحنا من 4 سنين نشارككم كل لحظات فرحنا وحزننا".

وتحدثت زينب قائلة: "وإحنا منفصلين بيننا كل الحب والاحترام، وإحنا كنا صحاب أصلًا، فهنفضل صحاب، وهيبقى فيه احترام بينا، لا أنا هشتمه ولا هو هيشتمني، ولا الكلام ده كله، إحنا عشرة، قضينا 4 سنين مع بعض، وفيه بنا حاجات كتير غير الأولاد، وإحنا عايزين ولادنا يشوفونا حلوين مع بعض".

ورد أحمد حسن عليها، قائلًا: "يعني يا جماعة مش علشان سيبنا بعض هتشوفونا كل يوم في المحاكم، وأنا أشتم فيها وهي تشتم فيَّ".

وأضاف أحمد حسن: "إحنا طلعنا علشان نفهمكم، لأنه دي آخر مرة هتشوفونا فيها مع بعض".

كما كشف الثنائي طريقةَ عمل قناتهما على "يوتيوب" بعد إعلانهما الانفصال رسميًا.

وقال أحمد: "اتفقنا إن القناة هيفضل عليها الفيديوهات زي ما هي وفي نفس الوقت هنقدم فيديوهات جديدة، لكن مش مع بعض، زينب هتنزل فيديوهات منفردة وأنا كمان، عبارة عن شركة بيننا إحنا الاثنين ومفيش بنا مشاكل وواثقين إن القناة هتفضل معانا إحنا الإثنين، سواء هي أو أهلها أو أنا وأهلي".

وأعلن اليوتيوبر أحمد حسن، أمس الأربعاء، انفصاله عن زوجته "زينب" بعد زواج دام 4 سنوات أثمر عن إنجاب طفلتين، علمًا بأن الثنائي هما من أشهر الأزواج على ”يوتيوب“، ويقدمان محتوى قائمًا على المقالب، واليوميات العائلية.