أنغام: اعتذرت عن فيلم "عن العشق والهوى" علشان كنت حامل
قالت الفنانة أنغام:"شاركت في مسرحيتين ومسلسل "في غمضة عين" وتجربة التمثيل بالنسبة لي كانت ممتعة وشيئا جديدا كنت عايزة أعمله".
فرصة تمثيل أنغام
وتابعت خلال الجزء الثاني من لقائها ببرنامج "سهرانين" الذي يقدمه الفنان أمير كرارة بقناة "أون إي":"لو جالي فرصة للتمثيل معنديش مانع ونفسي أكرر تجربة التمثيل تاني، لو جاتلي حاجة حلوة هوافق علطول".
اعتذار عن فيلم عن العشق والهوى
وأضافت:"اتعرض عليا فيلمين قبل كده واعتذرت عن فيلم منهم، وكان "عن العشق والهوى" لأني كنت حامل وقتها في عبد الرحمن ابني، ومعنديش مانع أكشن مع أمير كرارة".
وقالت الفنانة أنغام في نفس اللقاء: "أغنية "سيدي وصالك" كانت جديدة في كل حاجة، ونقلت الأغنية المصورة في حتة تانية والمخرج أحمد المهدي كان كل شوية يعيد تصوير الكليب وتعبت فيها جدًّا".
دعم وردة الجزائرية
وتابعت: "وردة الجزائرية بعد كليب "سيدي وصالك" كلمتني من باريس، وأنا فرحتي كانت قد الدنيا بكلامها لأنها كانت بتكلمني في عز مرضها ومعرفش إزاي الكرم بتاعها كان غير عادي وقالت لي الأغنية هتكسر الدنيا وهتقولي وردة قالت، وقد كان الأغنية نجحت نجاح كبير".
حفلات وردة الجزائرية
ولفتت: "وردة الجزائرية لما ابتديت أغني كانت بتطلعني في معظم حفلاتها ، وكنت بطلع أغني قبلها وكانت بالنسبة لي فرصة عظيمة، وكترت جمهوري، وفي يوم من الأيام حطت صورتي جنب صورتها على الأفيش في حفل نادي الترسانة".
وأكملت: "حفلات وردة الجزائرية كانت مهمة أوي بعد أم كلثوم وعبد الحليم حافظ، والناس كانت بتقعد تتفرج بالليل في السهرة عليها، وهي من اللي ربوني فنيا وإزاي أقف على المسرح وآكل الناس".
أصوات مصرية تستحق الدعم
وأشارت: "فيه أصوات كتير تستحق الفرصة وإني أدعمهم ومنهم من البنات ريهام عبد الحكيم ومي فاروق وكارمن سليمان، ومن الأصوات الرجالي محمد الشرنوبي، وبعتبره ابني وصوت عظيم وموهوب جدًّا، وأحمد جمال، وبموت في صوت هيثم شاكر، وبهاء سلطان عشق ومن أجمل الأصوات اللي خلقها ربنا وعيني أديها للأصوات دي".
كواليس أغنية شنطة سفر
ولفتت في نفس اللقاء: “أغنية شنطة سفر، مهمة وفي وقتها لأن فترة كانت الشباب بتهاجر وكل بيت تدخله تلاقى شاب مسافر علشان أكل العيش، والشاعرة فاطمة جعفر إسكندرانية زيي وكتبتها علشان أخوها كان مسافر، وغنيتها وأبويا لحنها، وكانت بالمناسبة ما كانتش بتاعتي وأخدتها ودي كانت نعمة ورزق، وأنا أخدتها من أبويا علطول بدون استئذان، وأبويا أحرج شوية من الست ولكني قلت له دي فارقة معايا وعايزاها وغنتها، والمنتج اللي كان عامل لي الشريط ده توفي فكده ما كانش فيه إنتاج”.
