السيسي: "ظروفنا صعبة.. ولما ربنا يفرجها علينا هنفرجها على الناس كلها" | فيديو
قال الرئيس عبد الفتاح السيسي: "أنا مسئول عن المصريين وعلشان كده مقدرش أغفل أو أتجاوز أي حاجة تيجي قدام عيني لأني هتحاسب قدام ربنا سبحانه وتعالى لو شوفت وطنشت أو سكت".
التخفيف عن المصريين
وتابع خلال مداخلة هاتفية ببرنامج "من مصر" الذي يقدمه الإعلامي عمرو خليل بقناة "سي بي سي": "فيه مشاكل كتيرة وفيه بيوت كتير وناس كتير في مصر عندها مشاكل أكيد بس على الأقل أشوفهم وأساعد في حل مشاكلهم، وأتمنى أننا كلنا كمصريين ومسئولين أن نبقى عارفين إن اللى هيخفف عن حد ربنا هيخفف عنه.. وهنقف قدام ربنا ويمكن كلمة وشفاعة من أخت ست زي السيدة محروسة تبقى شفاعة طيبة تقول لما شافنا حاول يحل ويساعد، وربنا وحده اللي يعلم أننا مش عايزين حد محتاج أو محووج بس إحنا ظروفنا صعبة أوي وخلوا الناس الطيبة تدعى إن ربنا يفرجها علينا".
مساعدة المحتاجين
وأضاف الرئيس السيسي: "لما يفرجها علينا هنفرج على الناس كلها ومش هنسيب حد، وفيه مئات الألوف محتاجين المساعدة ومش شايفنهم ويمكن صوتهم مبيوصلناش ولكن ربنا يعلم أني شايفهم وحاسس بيهم وبجري على قد ما ربنا يقدر".
وأشاد الرئيس عبد الفتاح السيسي بالدور الفعَّال والهام الذى تقوم به المرأة المصرية في ظل الظروف والتحديات، مؤكدًا أن نساء مصر نموذج مشرِّف للعمل والمثابرة ورقي المجتمع.
المثل الراقي للمرأة
وأضاف الرئيس السيسي خلال مداخلة هاتفية ببرنامج "من مصر" الذي يقدمه عمرو خليل، المذاع على قناة "cbc": تظل المرأة المصرية بمثابة المثل الراقي والعالي.
استجابة الرئيس
واستجاب الرئيس عبد الفتاح السيسي لمطالب السيدة محروسة سالم إحدى الأمهات المثاليات والتي تعاني من شلل حركي، موجهًا لها رسالةً مؤثرةً قائلًا: "لي الشرف إني أكلمك وأتواصل معاكي، وبقولك ربنا يوفقك ويخليكي".
وقال الرئيس السيسي: "أهنيكي وأقولك يا بنتي ربنا يجبر بخاطرك ويعينك ويطرح البركة في جهدك وتشوفي ده في أولادك، وكل اللي إنتي بتتمنيه كبنت لينا نقف جنبك، وأقولك أن الست المصرية مثل عال وراق ونموذج محترم وأتشرف أني باكلمك وأتشرف بجهدك، وربنا يخللي لك نورهان وأحمد وتفرحي بابنك ظابط قد الدنيا ومهندسة قد الدنيا، واوعى تحرمينا من دعواتك الطيبة، وربنا يقبل منك، ويباركلك، وربنا يعوض عليكي، ورضاكي هو ده الأمل بالنسبة إني أكون سببًا في إسعاد الناس وده ليس على الله بكثير وربنا يعيننا، وإنتي تطلبي وإحنا ننفذ".
تعليق السيدة محروسة
من جانبها، علقت السيدة محروسة: "ربنا يخليك لينا يا سيادة الرئيس، ويجازيك ألف خير على اللي عملتوا مع ذوي الإعاقة، وكتبت شهادة ميلادنا بإيدك، وإني أكلم حضرتك دي حاجة تشرف، ولا أستطيع التعبير عن مدى فرحتي وسعادتي، وحاسة أني قلبي هيقف من كتر الفرحة.. ومحروس يا ريس".
