عمرو أديب: شيرين عبد الوهاب بتغرق وفي كرب عظيم.. الحقوها
علق الإعلامي عمرو أديب، على بكاء الفنانة شيرين عبد الوهاب، خلال حفلها في دولة الكويت، والملابس الغريبة التي ارتدتها خلال الحفل.
بكاء شيرين
وقال عمرو أديب خلال برنامج “الحكاية” المذاع على قناة “mbc مصر”: "ظهرت شيرين على المسرح في الكويت مش شيرين عبد الوهاب شكلها مختلف وترتدي ملابس مختلفة وأجهشت بالبكاء أكثر من مرة".
محنة شيرين عبد الوهاب
وأضاف: "تشعر أن شيرين في محنة وانقسم العالم إلى قسمين ناس قالوا ده إستايل جديد، وناس تانية قالت لأ هي في حالة اكتئاب عميق وبشكل عام يا جماعة ممكن الانسان يبقى عنده كل حاجة عندها الفلوس والشباب والشهرة والموهبة وكل شيء ولكن هي في حالة كرب عظيم أو هكذا اتخيل لو هي مفيش حاجة وكويسة وكله تمام هاكون سعيد إنما عايز اطلع من حالة شيرين وأن ناس كتير اتفقت أنها عندها مشكلة، احنا نعيش أيام صعبة وحتى ابتدوا دلوقتي يطلعوا لنا أبحاث عن الناس اللي جالها كورونا وأنه بيأثر نفسيًّا في الانسان وناس كتير بشوفها حوالي عايز يسيب نفسه يغرق وأنا شوفت شيرين كده عايزة تغرق ومش عايزه تقاوم ماشية زي ما الموج بيمشيها ولما تغرق تغرق".
عصر المصائب
وتابع: "العصر اللي احنا فيه صعب وكل يوم فيه مصيبة جديدة، وانا رأيي إن الأمر لازم يكون فيه بعض المقاومة ونعوم شوية لغاية لما نلاقي مركب أو شط ونرسى عليه إنما حالة إنك مش قادر عمرها ما هتوصل لحاجة وفي الأيام الصعبة لازم تقاوم كتير وتقف على رجلك ومش هيطلعنا وينجينا في اللي احنا فيه غير ربنا، الالتجاء إلى ربنا مهم ثم مبقاش الناس بتقف جنب بعض وبقى كتيير الناس عايزة تقطع في بعض ولما تشوفك بتغرق تقولك اغرق وموت وحالة من التوحش غير طبيعية وكان زمان رمز القوة والجمال الراجل اللى ينط من فوق الكوبري علشان يلحق ينقذ حد بيغرق إنما دلوقت لأ، كان زمان اللي يطلعك من الدوامة صديق أب أم فاعل خير وكان فيه حاجة كده دلوقت مفيش فاعل خير، وحاسس فعلا بحالة من حالات التوحش".
الدعم النفسي لشيرين
وأكمل: "التعليقات اللى علي شيرين لما اجهشت في البكاء غريبة، لو كل واحد وقف جنب واحد هيبقوا اتنين والمجتمع يقف على رجله ودي من أكثر الأوقات اللي محتاجين نقف فيها جنب بعض، ولكن لما يكون فيه مصيبة بحس بحالة من الشماتة، شيرين محتاجة اللي يساعدها وكلنا محتاجين اللي يساعدنا، بقولها امسحي دموعك يا شيرين وقولوا لها كلمة حلوة وربنا معاكي وربنا يقف معاكي ويخرجك من محنتك علي خير، شيرين ان شاء الله تطلع من الأزمة اللي فيها وشيرين من أهم 10 مطربين في الوطن العربي في العصر ده، ربنا مع شيرين وإن شاء الله حالتها تتحسن في الأيام الجاية وإلا محدش عارف ايه اللى هيحصل".
وأمتعت الفنانة شيرين عبد الوهاب جمهورَها بحفلها الفني الذي رفع لافتة "كامل العدد" بمدينة الكويت لرياضة المحركات، وقدَّمت وصلتها التي استمرت ساعة من الزمن، وأدت مجموعة متنوعة من أغانيها القديمة والجديدة.
