الشغل بقى بالشحاتة.. شريف إدريس يعلن اعتزاله الفن
أعلن الفنان الشاب شريف إدريس اعتزاله الوسط الفني وذلك بسبب تعرضه للكثير من الصعوبات بالوسط بالإضافة لقلة أعماله الفنية في الفترة الحالية وعزوف المخرجين والمنتجين له.
شريف إدريس
وكتب شريف إدريس منشور صادم عبر حسابه الشخصي بموقع التواصل الاجتماعي فيس بوك قائلًا: بسم الله الرحمن الرحيم.. بعد 35 سنة سعي وتعب وشقى في الوسط الفني؛ قررت الاعتزال والابتعاد تماما، وتغيير مسار حياتي، وأي حد عنده فرصة سفر ليا هكون شاكر ليه، وده طلبي الوحيد.
اعتزال شريف إدريس
وتابع شريف إدريس: ده قرار أخدته بعد ما الأمور وصلت في الوسط الفني لمرحلة عبثية؛ وصلت أني بقيت بشوف بعض الزملاء بيشحتو الشغل علني علشان يشتغلو لأن الشغل بقى متقسم على ناس معينة، فلو الأمور وصلت لكده أبعد أحسن.
وأضاف شريف إدريس: حتى لما بيجي شغل بيتفرض عليك توافق بأقل الفلوس، وتخرج من الشغل مديون، ومواقف مهينة زي أن شركة إنتاج تعرض عليك أجر هو قيمة ربع أجرك، والسبب أن الميزانية مصروفة على الديكور.. طب خلو الديكور يمثل.
فيما استكمل شريف إدريس: هحكيلكم موقف حصل معايا من أسبوع اتصل بيا حد قالي عايزين حضرتك بكرة، عندك تصوير في مسلسل كذا، بس هتدفع 10% للكاستينج دايريكتور، كان هيجيلي جلطة بعد ما قفلت المكالمة، ووافقت علشان أنا محتاج أشتغل ومحتاج فلوس، وماقدرتش استوعب الفكرة بصراحة، أني بعد العمر ده.. مضطر أدفع علشان أشتغل.. فاتصلت واعتذرت.
واختتم الفنان شريف إدريس بــ: ده الحال حاليًا..أن الأمور بقت في إيد كاستينج دايريكتور وده موقف من مواقف كتير مريت بيها، لو حكيتها محتاجة كتاب مش بوست على الفيس، فطالما الشغل بقى لازم يتدفعله، وطالما الشغل بقى بالشحاتة، يبقي بلاش أحسن.
