شيرين: الزواج مثل البطيخة.. ولهذا السبب رفضت الارتباط | فيديو
قالت الفنانة شيرين: "أثبتت كل التجارب العلمية والمعملية والعملية أن الفن والزواج لا يجتمعان إلا فيما ندر ولو اجتمعا لمدة من العمر لا تكون لطيفة".
زواج البطيخ
وأضافت خلال لقائها ببرنامج "كلام الناس" المذاع على قناة "إم بي سي مصر": "الجواز زي البطيخة ممكن تطلع حمرا وممكن تطلع قرعة".
سبب رفض الزواج
وتابعت: "ما رضتش أرتبط تاني علشان ما أجيبش لبنتي حد غير أبوها تقوله يا بابا، وتجربة الزواج الفاشلة ما سبتش جوايا عقدة من الرجالة ولكن أنا كانت رغبتي عدم تكرار التجربة".
وقالت الفنانة شيرين في نفس اللقاء: "لا أمانع في المشاركة بأي عمل فني بشرط أن يكون جيدًا ويحمل رسالة، ولو فيه دور عجبني ممكن أعمله ببلاش".
مشاجرة ابنة شيرين
وأكدت خلال لقائها ببرنامج "كلام الناس" المذاع على قناة "إم بي سي مصر": "بسبب كلام الناس بنتي اتخانقت مع اتنين قالوا عليا كبرت وما بقتش حلوة".
مشاجرة السوبر ماركت
وأضافت: "في مرة كنا في السوبر ماركت وبعدين كان فيه 2 ستات لطاف طلبوا يتصوروا معايا وبعدين لقيت ميريت بنتي بتقول لأ فقلت لها عادي يعني، وبنتى قالتلهم مش أنتو كنتوا بتتكلموا عليها وبتقولوا إن ماما وحشة وكبرت ومش زي ما بتطلع في التليفزيون، أنا بنتها وسمعتك".
اعتزال التمثيل
وتابعت: "فيه ناس تعتقد أنني اعتزلت التمثيل ويطلبوا مني العودة للمشاركة في أعمال فنية وأؤكد لهم أني لم أعتزل بعد".
وقالت الفنانة شيرين في نفس اللقاء: "رفضت 5 أعمال فنية الصيف الماضي، ولو أنا ما احترمتش نفسي مش هلاقي اللي يحترمني".
رفض عمل فني
وأضافت الممثلة شيرين: "حد كلمني وقال لي احنا محتاجينك معانا فقلت له طبعًا ابعت لي السيناريو فقال لي معلش أنا مزنوق جدًّا في الوقت وعايزين نبدأ التصوير بعد يومين، فكانت الطريقة مش كويسة فرفضت الاشتراك في العمل".
الدور الجيد
ولفتت: "مفيش حاجة اسمها دور صغير ودور كبير ولكن فيه دور حلو ودور وحش، وممكن اطلع ضيفة شرف بس تكون التجربة حلوة".
التمثيل مع تامر حسني
وتابعت: "جسدت 4 مشاهد مع تامر حسني وهما أفضل عندي من دور بطولة مع نجمة لم تحترم تاريخي، وأنا بقول له إلى الأمام ومن نجاح لنجاح وهو بيهتم بالتحلين والكلمات والإخراج والكتابة وبيحدث في نفسه دايمًا ودي حاجة كويسة".
