خالتي شرعية.. الحلقة الرابعة
شرعية: النصر لنا النصر لنا
بهية: النصر للحق مش للباطل وانتم حكمكم كان على باطل
شرعية: أبدا إحنا حكمنا كان على حق كان وفق انتخابات ديمقراطية وجينا بالصندوق والشرعية ومرسي أول رئيس مصري منتخب
بهيه: مرسي أول رئيس مصري فاشل، ده عمره ما كان رئيس ده كان برافان دلدول للمرشد ولخيرت الشاطر يا ريته حكم مصر وشعب مصر من دماغه ده كان بيحكم بدماغ المرشد والشاطر بقى ده رئيس إتوكسي وبطلي تدافعي عنه خايب الرجا ده اللي قسم البلد وكان حيجرها للفتنة والاقتتال الأهلي الله يسامحه بقى على اللي عمله فينا وعموما إحنا السبب إحنا اللي إدينا أصواتنا لواحد لا نعرف أصله ولا فصله خدعنا بدقنه يروح يحلقها أحسن اللي ما التزمش مع المصريين بأي وعد قطعه على نفسه يوم ما كسب الانتخابات الله يكسفه
شرعية: انتم شايفينه كده واحنا شايفينه أفضل رئيس حكم مصر
بهية: هو انتم بتشوفوا من أصله انتم عندكم عمى وغشاوة على عنيكم انتم ما بتشفوش إلا مصلحتكم وبس أنانيين اهدوا بقى وسيبوا المركب تمشي ولا انتم مُصرّين إنكم تغرقوها كفاية تظاهرات ولموا نفسكم وروحوا بيوتكم وعيشوا زي كل الناس واستنوا الخير من بكرة ارحمونا بقى وبطلوا قتل وفتنة وكدب وضلال
شرعية: مش حنمشي إلا لما مرسي يرجع القصر
بهية: انتي باين عليكي اتجننتي مرسي مين اللي يرجع القصر مرسي ده كان صفحة سودة وانطوت من تاريخ مصر فوقي بقى انتي واللي زيك وبطلوا أحلام اليقظة دي اللي حتوديكوا في داهية الجيش صابر عليكم بس للصبر حدود
شرعية: يعني الجيش حيعمل لنا إيه تاني بعد ما ضرب رجالتنا قدام الحرس الجمهوري؟
بهية: الجيش ما ضربش حد الجيش دافع عن نفسه وعن جنوده وظباطه ورجالته لما انتم هجمتم عليه وحاولتم تهربوا مرسي من هناك كنتم فاكرينه جيش حليمة انتم سذج وهبل بقى الجيش المصري ضعيف للدرجة اللي تسمح لشوية بلطجية ومجانين مغيبين إنهم يهرّبوا رئيس معزول من قبضة الجيش المصري اتوكسوا أديكم اتسببتم في موت ناس كتير وبقى منظركم زبالة قدام المصريين
شرعية: مش مهم منظرنا قدام المصريين المهم منظرنا قدام ربنا
بهية: ربنا بريء منكم ومن أعمالكم الغبية دي وحيحاسبكم عليها يوم القيامة انتم جماعة الضلال مش جماعة مسلمين انتم لا تعرفوا دين
شرعية: أمال انتم اللي تعرفوه يا اللي منفلتين وعايشين وبس
بهية: إحنا عايشين وبس؟ الله يسامحك الدين يسر مش عسر مش معنى إننا مش محجبات أو بعض منا سافرات أو بعض رجالتنا مش مربيين دقونهم نبقى فسقة ماتخدعكيش المظاهر ما انتم بدقون ومحجبات ومنتقبات عملتولنا إيه بدقونكم؟ غرقتوا البلد منكم لله
شرعية: انتم عاوزين رئيس كافر يعمل معبد لبوذا في مصر
بهية: انتي بترمي على إيه على البرادعي؟
شرعية: أيوه برمي على البرادعي هو فيه غيره؟
بهية: البرادعي راجل محترم بيحب مصر والمصريين وبيتمنى لهم الخير ومش منتمي لأي جماعة منتمي لمصر وبس مصر وبس مش مكتب الإرشاد يا شرعية
شرعية: بقى ترفضوا المؤمن اللي بيصلي الفرض بفرضه وتتمنوا البرادعي؟!
بهية: الرئاسة والحكم مش بالصلاة والصوم بالعدل وتدبر الأمور والحكمة والمقدرة على استيعاب الكل ومرسي ما استوعبش غير الجماعة كأن مصر هي الجماعة وبس ونسي باقي المصريين مرسي ما حكمش بالعدل بين الناس نفعتنا بإيه صلاته وإيمانه وورعه لو هو كان يعرف ربنا كان عدل بين المصريين ده ربنا حيحاسبه على جرايمه في حق شعب مصر
شرعية: بكره تقولوا إن حكم مرسي أفضل حكم لما تتبهدلوا مع اللي جاي
بهية: بكرة ده اللي انتي بتتمنيه مش حييجي لأن اللي جاي عمره ما حيكون دلدول وحنختاره بعقولنا مش حننخدع تاني في حد كفاية اللي حصل لنا مع مرسي دي كانت أيامه سودة وضلمة
شرعية: انتم مالكمش في الطيب نصيب انتم ملاعين
بهية: إحنا طيبين انتم اللي ملاعين انتم اللي بتقتلوا وهانت عليكم مصر وعمرنا ماحنسامحكم أبدا الدم ما فيهوش سماح، الرسول قال زوال الكعبة حجر حجر أهون من إراقة دم مسلم بغير حق مش مكتب إرشاد وكرسي وسلطة انتم أبعد ما تكونوا عن الدين الإسلامي وتعاليمه الله يسامحكم على جرايمكم دي
شرعية: موتوا بغيظكم إحنا مش حنسيب رابعة قبل ما يرجع مرسي
بهية: يبقى مش حتسيبوها أبدا خليكم فيها قاعدين ليوم الدين اللي في بالكم مش حيحصل أبدا ده وَهم انتم عايشين فيه ومصدقينه بكره تفوقوا منه ربنا يتولاكم برحمته!
