عمرو أديب عن انتخابات الزمالك: الستات اتهرست والبهوات اتضربوا
قال الإعلامي عمرو أديب:"انتخابات نادي الزمالك حاجة مسيئة وشيء مسيء جدا لصورة نادي الزمالك وصورة طرف أساسي في الرياضة المصرية".
انتخابات نادي الزمالك
وتابع خلال لقائه ببرنامج "الحكاية" المذاع علي قناة "ام بي سي مصر":"اعضاء نادي الزمالك المفترض صفوة المجتمع، ستات بتتهرس وشباب بتجرى وراء بعض ".
صلاة الجمعة في الزمالك
وأكمل:"هل المنافسة حامية الوطيس للدرجة دي، يا جماعة النادي كان فيه خناقة علي صلاة الجمعة؟ هي الأخلاق في مصر جري فيها ايه؟ما احنا شوفنا انتخابات تانية زي الفل..احنا بنتخانق علي ايه في انتخابات الزمالك؟..اللى حصل النهاردة في نادي الزمالك مخجل".
مشاجرات نادي الزمالك
وأكمل:"لو يرضى حد الخناقات اللى حصل انا موافق، بهوات ودبل بيضربوا في بعض طحن والست بتتهرس تحتهم، انا مش عارف بيتخانقوا علي ايه؟ انا مش فارق معايا مين اللى يكسب ولكن في النهاية ايه اللى بيحصل ده من شتايم وخناقات من صفوة المجتمع".
انتخابات نزيهة
واستطرد:"ده بطل افريقيا ونادي الوطنية، ستات تتضرب واطفال تتبهدل ورجالة تطحن، ده لا يمكن يكونوا اعضاء نادي الزمالك، هل ده مستوي اخلاق بهوات اعضاء النادي، هو ده شكل انتخابات وورق مترمى في الأرض، المنظر والله مش مشرف لا للرياضة ومصر متشيلش الكلام ده، دا انتوا لو اعداء يا راجل مش هتعملوا كده، والكسبان هياخد ايه ده نادي مش لاقى ياكل وعنده ازمات مالية، ومش عارفين لسه نجدد للاعيبة، هو ده كده جو انتخابات نضيفة ونزيهة؟ انا معرفش بس المنظر اذاني للنادي اللى انا بحبه طلع شكله وحش".
حرب شوارع
وتابع:"لمصلحة مين يطلع شكل انتخابات نادي الزمالك بالشكل ده، احد الناس قالك ده حرب شوارع يا نهار اسود ده انا مشوفتش كده من ايام الإخوان".
بدء فرز الأصوات في انتخابات نادي الزمالك
أعلنت اللجنة المشرفة على انتخابات نادي الزمالك غلق باب التصويت عند الساعة السابعة مساء، وبدأ فرز الأصوات مع الساعة 9 مساءا بسبب حالة الإقبال الكبيرة التي شهدتها العملية الانتخابية.
وسمحت اللجنة لمن هم داخل الخيمة الانتخابية فقط بملعب عبد اللطيف ابو رحيلة بالادلاء بأصواتهم حتى مع غلق باب التصويت؛ أما من يتواجد خارج الخيمة فلن يستطيع التصويت بعد السابعة مساء.
