قلقت منه لما رحتله المكتب.. يحيى الفخراني يكشف سبب رفضه بطولة "المصير" ليوسف شاهين
قال الفنان يحيى الفخراني: "كنت هشتغل في فيلم المصير، والمخرج خالد يوسف هو اللي كان رشحني ليوسف شاهين علشان أشارك في العمل".
كواليس رفض فيلم المصير
وأضاف خلال لقائه ببرنامج "صاحبة السعادة" الذي تقدمه الفنانة إسعاد يونس بقناة "دي إم سي": "لما قابلت يوسف شاهين قاللي الدور ده محدش يعرف يعمله إلا أنت بعد ما شوفتلك شغلك، قلت له أنا مسافر إسكندرية دلوقتي فقالي طب اقرأه في السكة".
تغيير حوار الفيلم
وتابع: "طول السكة بقرأ دوري في فيلم المصير، ولما وصلت الإسكندرية قلت له الفيلم كويس بس عايز إعادة حوار السيناريو أنت المسئول عنه بس الحوار عايز تغيير لأني أنا اللي هقول كده وفعلًا يوسف شاهين وافق على رأيي واقتنع ودي كانت سابقة".
سبب رفض فيلم المصير
ولفت: "الحوار كان فيه حتة خواجة كده مكنتش عجباني فقاللي تاخد كام فقلت له اللي أنت عايزه فقاللي رقم فوافقت وقلت أنا هاجي وأمضي على الفيلم، فلما روحت المكتب بتاع يوسف شاهين مكنش هناك فلقيت الأفيش فيه شاب لسه جديد ومكتوب اسمه كبير أوي ولقيت ممثلين قدام جدا ومحمود المليجي مكتوب صغير فانتبهت للموضوع ده وقلت له عليه، فقاللي أنت بطل مطلق، وقاللي أنا كتبتك الاسم الأول هنقلل الأجر بقى شوية فالكلمة دي قلقتني مش علشان الفلوس لكن حسيت إن كلمته مش واحدة، فقلت له أنا هفكر تاني في الفيلم ده لأني عندي ظروف، فكلمني بعدها خالد يوسف وقاللي معلش والأستاذ حس أنك اتضايقت فقلت لأ مينفعش، واعتذرت عن فيلم المصير".
وروى الفنان يحيى الفخراني تفاصيلَ مشهد مضحك له مع فأر، قائلًا: "لا أحب الفئران مثلي مثل الكثير من المواطنين، وأثناء تصوير أحد الأعمال الفنية كان هناك مشهد مع فأر لكني رفضت وتركت الإستوديو ومدير التصوير تدخل لحل المشكلة التى بيني وبين المخرج، وبعد نقاشات كثيرة، تم الاستقرار على أن يتم تصوير المشهد ويتم ربط الفأر بحبل".
وأضاف خلال لقائه ببرنامج "صاحبة السعادة"، تقديم الفنانة إسعاد يونس، المذاع على فضائية "dmc": الفأر مات بعد أن تم ربطه، وتم تصوير المشهد وهو ميت، والجميع دخل في حالة ضحك شديد.
وكشف أنه كان مرشحًا للقيام بشخصية الفنان الراحل محمود عبد العزيز فى فيلم "العار"، بطولة الفنان الراحل نور الشريف، وحسين فهمي، كان سيجسد دور الفنان الراحل محمود عبد العزيز في فيلم العار، ولكنه رفض المشاركة فى الفيلم، ورشَّح محمود عبد العزيز.
