والد ياسمين صبري يخرج عن صمته ويكذبها: "كانت بليدة.. وشهاداتها كلها كحك"
فاجأ أشرف صبري، الجمهور بالهجوم على ابنته الفنانة ياسمين صبري، واتهمها بالكذب في تصريحاتها الأخيرة، والتي ذكرت فيها أنها عاشت حياة بسيطة ولم تحصل على كل ما أرادته.
فيما نشر والد ياسمين صورة لمدرسة ياسمين على حسابه بموقع "فيس بوك"، وكتب عليها معلقًا: "دي المدرسة اللي اتخرجت منها بناتي، اللي واحدة منهم بتدعي أنها كانت في مدارس عربي، وعاشت حياة بائسة فقيرة، وأنها وصلت بمجهودها! هو الكدب في حد يوصل للدرجة دي؟".
لها شغالة فليبينية.. وبتلبس من باريس
وأضاف قائلًا: "أنا أفهم الكدب لما تبقى غلبانة، وتكدبي تقول: أنا من عيلة كبيرة، ومدارس أجنبية، وعشت في سرايا، وبابي كان وزير، وهو بيشتغل عامل! يبقى كذب له مبرر! لكن إن واحدة اتولدت لها شغالة فليبينية بتلبس من باريس؛ لأني كنت بأجيب لها لبسها من هناك، ودخلت مدرسة الـEGC، أرقى مدارس الإسكندرية في وقتها".
كانت بتترفد في السنة مرتين
وتابع متحدثًا عن مستواها الدراسي: "وعاشت في فيلا بحمام سباحة وصالة جيم، ولها غرفة خاصة بحمامها، وكانت بليدة وطلَّعت تروحي، ويا دوب تنجح بالعافية بخمسين في المية، وكانت بتروح الكلية بالعافية وأصحيها الصبح بالساعة علشان تروح الكلية، وتترفد في السنة مرتين، وعميدة كلية إعلام بيروت موجودة وتشهد.. كنت أروح دايمًا أقدم اعتذارات وشهادات طبية علشان ترجع الكلية وشهاداتها عندي كلها كحك وأبوها دكتور".
واختتم باتهام ابنته بالكذب قائلًا: "تطلع تدعي أنها عاشت حياة بائسة وغلبانة، وبتكمل باقي الشهر من غير فلوس! إيه الكدب والفيلم المتخلف ده؟! انتي عايشة دور تمثيل وارثاه من جد والدتك سيد سليمان.. وبتكدبي ليه؟!. هتاخدي نيشان يعني على خيبتك وفقرك وصلتي وبقيتي حاجة؟! انتي بالنسبة لأبوكي حتة عيلة مش فاهمة بتعملي إيه غير أنك بتشوهي اللي ربَّاكي علشان الناس تصفق لك حتى اخوكي بهدلتيه، اللي طول عمره جنبك وبييجي من آخر الدنيا علشانك! يا شيخة بطَّلي اللي انتي فيه ده، وحسبي الله ونعم الوكيل فيكي.. بطَّلي تجيبي سيرة عيلتكي.. أبوكي اللي ربَّاكي منك لله".
يذكر أن ياسمين صبري تحدثت مؤخرًا في "سبيس" عبر "تويتر"، وقالت إنها لم تكن طفلة تحصل على كل ما تريده، ولكنها دربت عقلها الباطن على تخيُّل الحياة التي ترغب فيها.
