أرملة وائل الإبراشي: الطبيب المعالج كان بيدخن بشراهة بجواره واستخدم أدوية مجهولة
قال الإعلامي عمرو أديب: "كان عندي مكالمة دامت لمدة ساعة مع أرملة الإعلامي الراحل وائل الابراشي وكشفت لي عن معلومات حول أخطاء الطبيب المعالج لحالته".
بداية مرض الإبراشي
وأضاف خلال برنامج “الحكاية” المذاع على قناة “إم بي سي مصر”: "أرملة وائل الإبراشي أخبرتني إن السنة اللي فاتت في الإجازات آخر السنة سافرت اليونان هي وبنتها وكانت بتتفرج عليه في التليفزيون وقالت له له كحتك مش عجباني فالإبراشي وهو بيشتغل عمل مسحة واتصل بيها وأخبرها إن عندي خبر وحش؛ عندي كورونا".
تدخين الطبيب المعالج
وتابع: "قالت لي اكتشفنا إن الطبيب المعالج كان بيقيم مع الإبراشي في المنزل ويدخن بجواره بشراهة وهذا ما تسبب في تدهور حالته وأعطى له أنواع أدوية غير مكتوب عليها اسم علمي وبعد نقله إلى المستشفي تبين وفاة عدد من المرضى علي يد هذا الطبيب المعالج".
أدوية مجهولة
وأوضح: "أرملة الإبراشي قالت لي إنه ثبت إن الأدوية غير متخصصة فهذا خطأ طبي عن عمد، وقدمت بلاغًا للنائب العام في الطبيب المعالج وشكوى ضده في نقابة الأطباء".
مناشدة عمرو أديب
وناشد “أديب”، نقابة الأطباء، قائلًا: "لمرة واحدة وقولوا لنا احنا صح ولا غلط 99.9% من أطباء مصر عظماء ولكن فيه ناس لازم تتحاسب على أخطائها، أناشد النائب العام أن تكون القضية تحت نظره ووجود تحقيق داخل نقابة الأطباء وبلاش حساسية غير معتادة عن أخطاء الأطباء، أنا ما أعرفش أعيش من غيركم بس فيه ناس ما بتعرفش تعيش بيكم".
وقال الإعلامي عمرو أديب: "وائل الابراشي مش هيتعوض، اللي بيمشي منا في شغلانتنا ما بيجيش غيره وفي أدائهم قليلين جدًّا، ومن فترة مسمعناش إن حد ممكن يقعد مكان حد، والإبراشي مذيع عظيم ومش ممكن يتكرر".
الشماتة في وفاة الابراشي
وتابع خلال برنامج “الحكاية” المذاع على قناة “إم بي سي مصر”: "وائل الابراشي ما كانش بيقول رأيه إلا لما يبين كل الآراء وبيقدم قلب الحاجة من جوا، واللي بيشتغل شغلانة التوك شو أصله صحفي مش أصله مذيع، والإبراشي كان دوره في طرح قضايا هامة، وتأملت جدًّا إن ليلة وفاته الهاشتاج اللي أكبر منه الشماتة في وفاته والراجل مات ولما مات واللي عملوا كدا حيوانات مش بني آدمين وعندي ليهم سؤال هو إشمعنا لما الناس بتوعكم بيموتوا مش بنعمل كده وأنا مش فاكر لما مات محمد مرسي أو عصام العريان ما طلعتش شمت في موتهم وأنا ما أقدرش أكون حيوان زيهم، والقتلة وبرابرة الباء الكلاب قبل ما يدفن الابراشي شمتوا فيه، ما قدرش يواجهه وهو حي وبارزوه وهو ميت".
رسالة عمرو أديب للجمهور
وتابع: "لما أموت ابقوا اقفوا جنبي وما تسبوش الحيوانات ينهشوا في لحمي، وشعرت أن الناس مش هتقف جنبي لما أموت وبلاها شغلانة، فين النخوة والشعور بالبشر، ولجان الشماتة مش إخوان بس معاهم تيار ديني بيظهروا لما الإخوان بيظهروا وفيه طرف تالت قاعد في البيت ومستني الحاجات بتاعت زمان ترجع تاني".
شماتة الإخوان
وأكمل: "هل سمعتو إن فيه مذيع مات في بريطانيا أو فرنسا أو موزمبيق مات والناس قالوا أحسن ويشمتوا فيه، ليه بقى لما حد مننا يموت تشمتوا فيه؟ ومن مات منا فهو كافر ومن مات منكم من الشهداء وفي العليين، هو انتوا مطلعين على ربنا والغيب، جايز ربنا رحمه رحمة واسعة أكتر من المرشد بتاعكم".
